Politikki

Erik Jensen naalakkersuisunngussagunartoq

Martha Lund Olsenip (S) Nalakkersuisuisunut januaarip qaammataani ilaasortaajunnaarsinneqarnerata kingorna taassuma akisussaaffigisaanut naalakkersuisumit nutaamik Inatsisartut ullumi sisamanngornermi toqqaasussanngorput.

Allattoq Inge S. Rasmussen

apriilip 20-at 2017 07:00

Nutserisoq Bikki P. Kleist

ALLAASERISAQ NAL. 8.52 NUTARTERNEQARPOQ: Qeqqata Kommuniani kommunalbestyrelsip nutaap inissitsiterluni pingasunngorneq apriilip 26-ani ataatsimiittoqalerpat Erik Jensen kommunalbestyrelsimi qinikkatut sulinngiffeqarallarnissamik qinnuteqaataa oqaluuserisassat ilagigaat Qeeqata Kommunianit nalunaarutigineqarpoq.

Inatsisartut ataatsimiilerpata pissanganartoqarsinnaavoq.

Inatsisartut ataatsimiinnerisa ulluanni siullermi oqaluuserisassat arfineq marluupput, oqaluuserisassani immikkoortoq 16 qulequtaqarpoq: Naalakkersuisunik qinersineq.

Immikkoortoq oqaluuserineqartussaq qulequtaannartut nittartakkami inatsisartut.gl-imi
allaqqavoq.

Naalakkersuisunut ilaasortaasimasup Martha Lund Olsenip naalakkersuisuuffigisimasai Muté Borup Egedemit taartaaffigineqartussanngorlugit januarimi akisussaaffigineqalerput.

Mannalu Aatsitassanut Ikummatissanullu Naalakkersuisoq aamma Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisuuffeqarpoq.

Tusakkalli naapertorlugit Siumumeersup, Qeqqata Kommuniani kommunalbestyrelsimi qinigaasup, Erik Jensenip naalakkersuisuuffiit tigussavai.

Naalakkersuisunngornissamut atatillugu Erik Jensenip oqaaseqarfigiumanngilaa uppernarsarumanagulu. Siumulli siulittaasuanut Kim Kielsenimut innersuussivoq.

Naalakkersuisunik qinersinissaq pillugu Kim Kielsen oqaaseqartinniaraluaratsigu iluatsinngilarput.

Kisianni tassa Inatsisartut nalunaaqutaq aqqanermut ataatsimiilerpata Naalakkersuisunik qinersisoqartussanngorpoq.

Erik Jensen naalakkersuisunngussagunartoq

Aamma atuaruk