Erik Jensen ikiaroornartoq pillugu suliaq: Inatsisartut ataatsimiititaliaat aalajangiissiivarput
Ikiaroornartuuteqarnermut akiliisussanngortinneqarsimaneq Inatsisartunut qinigaarlaamut maannamut kinguneqartariaqanngitsoq, Siumup siulittaasua Erik Jensen isumaqarpoq.
Taanna KNR-imut taama oqarpoq.
Erik Jensenilli Inatsisartut Qinigaanerup Misilinneqarnissaanut Ataatsimiititaliaat alajangiisseerusunneruaa. Ataatsimiititaliallu taassuma Qarsoq Høegh-Dam qinigaarlaallu allat Inatsisartuni issiassanersut naliligassaraa.
Taamaammat tusarliupparput
KNR unnerluutigineqartut pinngitsuutitat pillugit tusarliussaqarneq ajoraluarpoq.
Unnerluunneqartullu ukiumit ataatsimit sivikinnerusumik pineqaatissinneqarsimasunut inissiisarfimmiittussanngortitat aqqi aamma saqqummiunneq ajoraluarpai.
Qarsoq Høegh-Damili pillugu suliaq immikkut ippoq. Taanna Inatsisartunut qinigaavoq. Taamaammat suliaq taanna tamanut saqqummiuttariaqarluinnartoq, KNR isumaqarpoq.
Qarsoq Høegh-Dam pineqaatissineqarsimasunut sapaatit akunneranni inissiisarfimmissasoq eqqartuussivimmit aalajangerneqarmat, tusagassiuinermi ileqqussat naapertorlugit tusarliutinngilarput.
Nunatta Eqqartuussisuuneqarfiatali ikiaroonartoq tuniniagassaanersoq uppernarsineqarneranngilaa, taannalu akiligassinnneqaannasssoq aalajangerluni.
Taamaammat tamanna tamanut saqqummiunneqartariaqartoq, KNR isumaqarpoq.
- Akisussaaffik Inatsisartut ataatsimiititaliaannut miloriutinngilara, aalajangiissiisariaqarparpulli. Ikiaroornartoq Inatsisartuni kommunimilu akuersaarneqanngilluinnarpoq, Erik Jensen oqarpoq.
Qarsoq Høegh-Dam tuniniagassamik 49 grammimik, politiit angerlarsimaffiani 2015-imi oktobarimi misissuinerminni nassaarisaannik, ikiaroornartuuteqartutut unnerluutigineqarluni eqqartuussaanermini pisuutinneqarpoq. Pineqaatissinneqarsimasunut sapaatit akunneranni inissiisarfimmiittussanngortitaavoq, tamannali suliassanngorteqqinneqarluni.
Tamanna Nunatta Eqqartuussisuuneqarfiani 2019-imi oktobarimi suliareqqinneqarpoq, ikioroornartorli angerlarsimafianiittoq tuniniagassaanersoq uppernarsarneqarsinnaasimanani. Taamaammat Qarsoq Høegh-Dam akiliisussanngortinneqaannarpoq.
Suliarlu aalajangiiffiginiaaruusaarneqarmat 1500 koruuninik akiliisussanngortinneqaannarpoq.
Erik Jensenip Inatsisartut Qinigaanerup Misilinneqarnissaanut Ataatsimiititaliaat innersuuppaa, ataatsimiititaliaallu qinersereernemi pilersinneqartartoq politikerinik tallimanik ilaasortaqartarpoq - ataaseq Inatsisartuni sivisunerpaamik ilaasortaasimasuusarpoq sinnerilu sisamat siulittaasumit toqqagaasimasarlutik.
Tassani ilaasortat qinikkat pillugit paasissutissanik suugaluartunilluunniit pineqaatissinneqarsimanermut pineqaatissinneqarsimannginnermulluunniit tunngasunik politiinit anngussivigineqartarput, qinikkallu ataasiakkaat Inatsisartuni ilaasortanngortussatut piukkunnarnersut paasissutissat tigusatik tunngavigalugit aalajangiisarlutik.
Inatsisartunngortut qinigaanerup misilinneqarnissaanut ataatsimiititaliassaminnik apriilip ulluisa 23-anni ataatsimiinnerminni pilersitsissapput.
Qinigaarlaat eqqartuunneqarsimasortaqartut
Inatsisartunulli Siumut sinnerlugu qinigaarlaap akiliisussanngortitaasimanera eqqartuunnneqarsimasut pillugit tusagassiuutini sammineqartutuaanngilaq. Qarsoq Høegh-Damimmi qatanngutaa, Minik Høegh-Dam, aamma sammineqartunut ilaavoq.
Avannaata Kommunianut Siumut sinnerlugu qinersiseqarnerpaasoq, Minik Høegh-Dam, aningaasarpassuaateqarsimagami Nunatta Eqqartuussisuuneqarfianut sassartussanngortoq, ataasinngormat tusarliupparput.
Politiit aningaasanik 150.000 koruuninit amerlanerusunik angerlarsimaffiani 2018-imi nassaarput, aningaasalli taakku ikiaroornartuerniarnermit inatsisinilluunniit allatut unioqqutitsinermit pissarsiarisimagai, unnerluussisussaatitaasut pasivaat.
AAMMA ATUARUK Borgmesterinngulersoq hashilerisutut pasineqarluni Nunatta Eqqartuussiviani suliassaasoq
Minik Høegh-Dam nammineq pinngitsuunerartoq marsip ulluisa 25-anni pinngitsuutitaavoq, unnerluussisussaatitaasulli tamanna Nunatta Eqqartuussisuuneqarfianut aalajangeqqitassanngortippaat.
- Siumut ikiaroornartumut akuersaanngilluinnarpoq, Erik Jensen Qanoruumi marlunngornermi tamanna pillugu apersorneqarami oqarpoq.
Minik Høegh-Dam Avannaata Kommuniani borgmesterinngortussatut qinigaagaluarpoq, kisianni Nunatta Eqqartuussisuuneqarfianut sassartussanngornini pissutigalugu Siumumit tatigineeruppoq.
Taannalu Siumumi ilaasortaajunaassasoq, siulersuisuunerit tallimanngornermi aalajangerput.
Uummannarmiu, Sakio Fleischer, Avannaata Kommuniani borgmesterinngussaaq.
Qarsoq Høegh-Dam apersorusussimagaluarparput, iluatsinngitsumilli.
Qarsoq Høegh-Damili pineqaatissinneqarsimannginnermik uppernarsaateqarluni facebookimi viedoliorluni eqqaasitsisivoq.
Tusagassiuutilli politikerinik misissuisussaatitaaneri akueraa:
- Maanna politikeriuvunga. Soorunami suna tamaat tikillugu misisuisoqartussaavoq.
- Politikerit soorunami sutigut tamatigut misisssorneqassapput. Taanna kiffaanngissusaavoq.
