Erik Bjerregaardip taartissaanik pisortassaqalersoq

Ilulissani akunnittarfik Hotel Arctic nutaamik pisortaaneqalissaaq, toqqarneqartorlu tassaavoq Hotel Kangerlussuarmi maannamut pisortaq.

Hotel Arcticimi ukiorpassuarni pisortaanerusoq Erik Bjerregaard ukioq manna soraarninngulersoq siorna novembarimi nalunaarutigineqarpoq, Hotel Arcticimilu maanna pisortaaninngortussaq tassaavoq Hotel Kangerlussuarmi pisortaq Morten Nielsen.

- Atorfimmut soqutiginninneq annertoorujussuusimavoq, taamatullu pisoqartarnera pitsaajuaannarpoq. Morten Nielsen toqqagaavoq, kiffartuussinermik ingerlatsinermillu pitsanngorsaanermi angusimasai, tassalu kingullermik Kangerlussuarmi, kiisalu Kalaallit Nunaanni avataanilu suliassaqarfimmik ilisimasaqarnera peqqutigalugit, Hotel Arcticip siulersuisuini siulittaasoq Ove Nielsen, tusagassiutinut nalunaarummi taama ilaatigut allaaserisaqarpoq.

Morten Nielsenip Hotel Kangerlussuarmi sulinermini nutaanik aningaasaliisarnerit kiffartuussinermillu tunisassianillu nutaanik aallussinerit aqqutigalugit amigartoorutit ukiut marluk ingerlaneranni sinneqartoorutinut saatsissimagai, Ove Nielsenip aamma oqaatigaa.

AAMMA ATUARUK Erik Bjerregaard Hotel Arcticimiit soraarniuteqarpoq

Morten Nielsenillu Hotel Arcticimi sulilernissani qilanaaraa:

- Hotel Arctic ukiut ingerlanerini nunatta iluani angalasut, takornariat ataatsimeersuariallu sullillugit nunatsinni akunnittarfinni siuttuulluni ineriartorsimavoq. Suliat annertoorsuupput, tamatumalu peqatigisaanik immikkoortuni tamani pitsaassuseq qaffasilluni, Morten Nielsen oqarpoq.

Morten Nielsen Hotel Arcticimi pisortaanertut juulip aallaqqaataani sulilissaaq, Erik Bjerregaardilu aggustip ulluisa 31-ata tungaanut suleqatigiikkallassallutik.