Erfalasuliisarneq qanganisaavallaaqaaq
Norge aamma erfalasuliinermik misilittagaqarpoq, tassa 1911-mi Sikuiuitsumi Kujallermi erfalasuliigami.
- Erfalasuliisarneq qanganitsereerpoq, atortuujunnaarnikuullunilu. Pissutsit ullumikkut atuuttut allaapput, Jonas Gahr Støre oqarpoq, nangillunilu:
- Nunap toqqavii tunngavigalugit aalajangiisoqartalernikuuvoq, nunallu Issittormiut kajumissaassavakka akisussaassuseqarnerusumik pissusilersortassasut. Oqaloqatigiinnerit tunngavigalugit aalajangiisoqartalernissaa Norgep pilerigineruaa, nunanut allanut ministeri oqarpoq.
Canadamiut Issittumik oqartussaanertik takutikkumallugu sakkutooqarfinnik marlunnik Canadap issittortaani pilersitsiniarput, Norgellu nunanut allanut ministeriata tamanna arajutsisimanngilaa:
- Pisuussutinut oqartussaatitaanissaq piginnittuunissarlu taamaaliornikkut qitiulersarpoq. Tamanna pisariaqanngikkaluarpoq aamma sakkutuuliisoqartariaqanngilaq, Jonas Gahr Støre naggasiivoq.
