Erdogan: Tyrkiami maajip 14-ianni qinersisoqassaaq
Tyrkiami inatsisartunut ukioq manna maajip ulluisa 14-ianni qinersisoqassasoq, Tyrkiap præsidentiata Recep Tayyip Erdoganip uppernarsarpaa.
Edoganip allattoqarfiata videoliaani, ippassaq sapaammi saqqummersinneqartumi, tamanna takuneqarsinnaavoq.
Tyrkiami inunnik isumasiuinerit naapertorlugit Tyrkiami qinersinissaq pissanganarsinnaassaaq.
Erdoganip Tyrkiami pissaaneq ukiut 20-t sinnerlugit matuma siornatigut tigummaguli, Erdogan aatsaat taama pissanganartigisumik qinersinermi angusaqassagunarpoq.
Erdogan Tyrkiap iluani, aammali Tyrkiap nunat killiit illersoqatigiiffianni NATO-mi iligisaasa akornanni, ilungersunartumik inissisimavoq.
Tapersersortikinnerujartuinnartoq
Erdogan Tyrkiami tapersersortikinnerujartuinnarpoq. Pingaartumik aningaasat naleerukkiartuinnarnerat pissutaallutik Tyrkiami innuttaasut naalakkersuinikkut siuttunut apeqqusiiartuinnarput.
Tyrkiami Erdoganimut illuatungiliuttut tuusintilikkaat maanna parnaarussaaqqapput. Inunnut parnaarussaaqqasunut pasilliutit nunani kisermaassilluni aqutsiffiusuni taamaallaat takussaasut, inuttut pisinnaatitaaffiit pillugit suliniaqatigiiffiit ilaatigut oqaatigaat.
AAMMA ATUARUK Finlandip Sverigellu NATO-mut ilaasortanngorsinnaanissaat Tyrkiap maanna tapersersoraa
Tyrkia nunat killiit illersoqatigiiffiannut NATO-mut ilaasortaavoq, nunalli NATO-mut ilaasortat Erdogan naalakkersuisoqataalu isoralugillu apeqquserpaat.
Erdogan Ruslandimut qaninniarsimasutut pasineqarpoq, pissanganartorsiorfiup nalaani russit raketiinik ilaatigut pisiortorsimalluni. Raketit pineqartut NATO-p timmisartuinik eqquisinnaapput.
Sverigep Finlandillu NATO-mut ilaasortanngorsinnaanissaat, Erdoganip qaammaterpaalunni mattussimasimavaa.