Eqqunngitsumik sullissisoqarneraapput
Tamannalumi ilumoorsimassagunarpoq. Napparsimasut maalaruteqartarfiata naammagittaalliuutinik pissarsiviusartup nalunaarsuinera naapertorlugu Kalaallit Nunaat inuttussutsiminut naleqqiullugu qaffasissumik inissisimavoq. 2006-imi Napparsimasut maalaaruteqartarfiata Kalaallit Nunaanni inuit ataasiakkaarlugit suliassat Danmarkimut sanilliullugu marloriaatingajaat tigusimavai.
62-inik ukiulik Gedion Lyberth 2001-ip aallartinnerani naaminik ippingiasulluni nakorsiarpoq, sunaaffali utikaajaarnialerami:
- 2002-mi sisamassaanik unitsinneqarlunga nappaatigisara paasineqarpoq, aamma eqqunngilluinnartumik. Ukiut marluk naallioreerlunga iisartakkerisumut tunniukkaluaraannga akerliuvunga, Gedion Lyberth oqarpoq.
Sunaaffalumi Gedion Lyberth kræftertoq. Kukkusumik nakorsaasersuleraluaraanni nammineq uteriinnerinnarminik aatsaat nappaatigisaa paasineqarpoq taamaasillunilu piffissaagallartillugulu Danmarkimi nakorsarneqarluni. Taassuma kingorna Giitiuut Danmarkimut nuuppoq, ullorlu manna tikillugu Københavnimi inisisuuvoq inissarsiortut akornanniilluni.
Ajoraluartumik nunatsinnit peqqinnerunissaq pillugu Danmarkimut nuuttut kisitsisaatigineqanngilaq.
Peqqinnissaqarfiulli napparsimasunik sullissinera naammagiunnarlugu nuuttut arlalissuit aterminnik imaluunniit immiunneqarusunngitsut radioaviisimit naammattortarpagut. Taakku ilagaat 55-inik ukiulik arnap aterminik taaseqqusinngitsup Aasianniit Odensemut ukioq kingulleq septembarimi nuuttariaqarsimasoq.
- Imaannaanngitsunik peqqissutsikkut ajornartorsiuteqarpunga, nuunninnullu taakku pissutaanerpaajupput, ukiullu 15-it ingerlanerini nunatsinni nakorsiartuaraluarlunga misissorneqarneq ajorpunga, nipaallisaatinillu tunineqaannartarlunga. Peqqiilligaluttuinnarnera nammineq malugigaluarpara, 55-inik ukiulik oqarpoq, nangipporlu:
- Ukioq ataaseq qaangiuppoq maannga nuukkamali, misissorneqartuarpungalu. Tamanna toqqissiallannaqaaq. Peqqinneruleriartunngikkaluarlunga iluaqaaq misissorneqartuarluni, eqqortunillu nakorsaasersorneqartarluni, 55-inik ukiulik oqarpoq.
55-inik ukiullip Danmarkimut tikereerluni misissortinnerata kingorna nakorsaata paasivaa niuata illuata naannerusoq, tamaammaallu ukiorpassuarni qiterluutigisimallugu, allaat sulisinnaajunnaassutaanik. Taassuma saniatigut astmarpoq maanna nakorsarneqalersimasunik.
