Eqqunngitsumik oqaaseqarsimaneragaavoq
Nuup Kommuneani kommunalbestyrelsemi ilaasortat ippassaq nalunaarput, Inuit Ataqatigiit Siumullu suleqatigiikkunnaartut. Tamatumunnga ilaatigut tunngavilersuutigineqarput Inuit Ataqatigiinni ilaasortap Ove Karl Berthelsenip eqqunngitsumik aviisimut Sermitsiamut oqaaseqarsimanera.
Ove Karl Berthelsenip maanna paaserusuppaa sooq Siumup eqqunngitsumik oqalunnerarsimaneraani.
januaarip 11-at 2008 06:26
- Nutaamik borgmesterinngortitsisoqalermat isumaqatigiissimagaluarpugut juullinnginnerani suleqatigiinnerput nutarterniarlutigu tamannalu suleqatigiissutigalugu ingerlatissagipput. Aammattaaq Sermitsiamut oqaatigaara decembarip 29-iani immikkut ittumik ataatsimeersuarnitsinni piareersarluartoqarsimanngitsoq oqaluuserineqartussallu illuatungerisanut suleqatigiissutigineqarsimanngitsut.
Isumaqarpunga Siumut sooq taamak sakkortutigisumik tigusinninnini akissuteqarfigisariaqaraa, Ove Karl Berthelsen Radio aviisimut taama oqarpoq.
