Eqqumiitsuliortut sisamat Danmarkimi saqqummersitsisut
Københavnip Rådhusiani eqqumiitsulianik saqqummersitsineq ”De nordatlantiske Øer”-imik -atlantikup avannata qeqertaanik - taaguteqartoq, ullumi ammaneqarpoq. Nunatsinniit eqqumiitsuliat sisamaannaat saqqummersinneqarput, killoq Islandimiit 62-iusut Savalimmiuniillu 20-usut. Nunatsinneersut taama ikitsiginerinut pissutaavoq nunatsinnit aningaasaleeqataasussat piumasaqaateqarsimanerat.
Atlantikup avannaani eqqumiitsuliat Københavnip Rådhusiani saqqummersinneqarnissaat isiginnaartitsiviup kiluani aaqqissuisartup Ole Koefoedip ukiup aappata affap matuma siorna isumassarsiaraa, Kulturborgmesterimit isumassarsiaq tapersersorneqarpoq. Atlantikulli avannaani sinniisut isumassarsiaq tapersersunngilaat. Kalaallit Nunaaneersut suleqatigiikkuminaassimaqisut Ole Koefoed oqarpoq. Namminersornerullutik Oqartussat nunatsinnilu takornariaqarnermi siunnersuisooqatigiit saqqummersitsinermi aningaasaliisuussagunik iluanaarniutigissallugu piumasaqarput. Soorlu KNI aningaasaleeqataassaguni tamulusagassaminernik piseqqusaaruteqarnissaa eqqaaneqarpoq. Tamannali Ole Koefoedip peqataaffigerusussimanngilaa.
Saqqummersitsinermi aningaasaliisoqassappat piumaasaqarsinnaaneq eqqaaneqaannartoq kalaallit eqqumiitsuliortut saqqummersitseqataannginnissaat aalajangerpaa.
Islandmiut Savalimmiormiullu ataqatigiissaarisuisa saqqummersitsinermi nunatsinnit eqqumiitsuliat ilaanissaat uteriissutigimmassuk kalaallit eqqumiitsuliortut sisamat Danmarkimi najugaqartut eqqumiitsuliat saqqummersitsinermi ilaatinneqarput.
Tamanna naammaginanngilluinnarpoq. Eqqumiitsuliammi nunatsinneersut tamatigoortuuneri saqqummersitsinermi takuneqarsinnaanngimmata, nunatsinni saqqummersitsisut sisamaasut ilaat ataaseq Gukki Møller oqarpoq.
Gukki Møllerip Ina Rosing, Lars Møller, Nuka Godtfredsenilu saqqummersitseqatigai. Marsip 28-ata tungaanut saqqummersitsisoqassaaq. Savalimmiuni Islandimilu kultureqarnermut ministereqarfiit timmisartortitsileqatigiiffiillu, Iceland Express aamma Atlantic Airways aningaasaleeqataapput.
