Savalimmiormiut eqqumiitsuliortut marluk nalunaaqutaaqqap kiinaasaanik killueqqusaanngitsut
Qalipagaq eqqumiitsuliaq Tal R-imit qalipanneqartoq savalimmiormiut marluk Dann Thorleifssonip Arne Leivsgaardillu Lethomik piginnittut, qalipagaq Tal R-imit 600.000 koruunilerlugu pisiarisimavaat.
Taakkulu eqqumiitsuliaq mikisunut aggoriarlugu nalunaaquttap kiinaasaanut atuinissartik isumassarsiaraat, nalunaaqutarlu ataaseq 10.000 koruunilerlugu tuniniarneqassalluni. Tamannali Tal R-ip pilersitseqqaartutut pisinnaatitaaneranut narrunarsaataasoq Tal R isumaqarpoq.
Tal R-ip qalipakkap sequminneqannginnerani pilersitseqqaartutut pisinnaatitaanerup akissuteqarfigineqarnissaata tungaanut nalunaaqutaaqqanut sananeqannginnissaa pillugu eqqartuussivik inerteqquteqarallaqquaa.
Illuatungeriit Imarsiornermi Niuernermillu Eqqartuussivimmut sapaatip akunnerani kingullermi saqqummiipput, eqqartuussiviullu suliaq eqqarsaateqarfigereerlugu eqqartuussisup, Mads Mundgaard Larsenip inerteqquteqarnissaq aalajangiuppaa.
Eqqumiitsuliortut marluk nalunaaqutaaqqanik Danmarkimi saqqummersitsinissamut, pilerisaarinissamut neqerooruteqarnissamullu” eqqumiitsuliamik ”Paris Chic”-imik agguinissamut, killuinissamut allatigulluunniit allannguinissamut” inerteqquteqarfigineqartut, eqqartuussinermi aalajangernermi nalunaarummi oqaatigineqarpoq.
Inerteqquteqarneq nalunaaqutaaraleriffimmut, Kanske Denmarkimut sammivoq, matumanili savalimmiormiut marluk piginnittuni ilaapput.
Tal R Danmarkimi eqqumiitsuliortut ilisimaneqarnerpaat ilagaat, nunanilu allanit aamma ilisimaneqarluni. Taassuma savalimmiormiut isumassarsiaat tassa eqqumiitsuliaa atorlugu aningaasanik iluanaaruteqarnissaat artorsaatigalugu sapaatip akunnerani qaangiuttumi eqqartuussinerup kingorna oqaatigaa.
- Qalipakkami qiortaalluni iluanaaruteqartoqarnissaa uggornaqaaq, Tal R sisamanngornermi eqqartuussinerup kingorna DR-imut oqarpoq.
Taannalu Politikenimut mailikkut aamma allappoq:
- Eqqumiitsuliara atorlugu aningaasannanniartoqartutut alutorineqarusuttutullu uanga isigaara, tamannalu aliasuutigaara.
Thorleifssonip Leivsgaardillu 300-400-lllu akornanniittunik nalunaaqutaaraliornissartik taakkulu 10.000 koruunikkaarlugit tuninissaat pilersaarutigalugu oqaatigaat. Tamannalu 3-4 millionit koruunit akornannik kaaviiaartitaqalernermik kinguneqassaaq.
Taakkuli taamaaliorniarnertik eqqumiitsuliornerulluni aningaasarsiniarnerunngitsoq oqaatigaat. Tamanna Berlingskemut siusinnerusukkut oqaatigaat.
Naleqqussaaneruvoq. Allap sanaavanik nammineq sulineragaananilu assiliinerunngilaq. Suliareqqaarneqartup nutaatut atulernissaanik pilersitsitseqqinneruvoq. Oqaluttuamik suliaqarpugut, Dann Thorleifsson Berlingskemut oqarpoq.
Imarsiornermi Niuernermillu Eqqartuussiviup inerteqquteqarnera utaqqiisaarutaavoq. Tamanna atajuartussanngussappat Tal R sapaatit akunneri marlunngortinnagit eqqartuussivimmut suliassanngortitsissaaq. Illuatungaanilu eqqumiitsuliortut marluk inerteqquteqarnermut aalajangertoqarnera eqqartuussisuuneqarfimmut aamma ingerlateqqissinnaavaat.
- Inerteqquteqarnermut sulianngortitsisoqassanersoq maanna utaqqivarput. Eqqartuussiviup aalajangernera eqqartuussisuuneqarfimmut ingerlateqqinneqassanersoq suli aalajanginngilarput, eqqartuussissuserisoq, Heidi Højmark Helveg eqqumiitsuliortunut marlunnut eqqartuussissuserisuusoq oqarpoq.
Tal R-ip eqqartuussissuserisuni marluk, Anders Valentin aamma Jørgen Permin ataasinngornermi aalajangertoqarnerata kingorna nalunaarummik allagaqartippai.
- Imarsiornermi Niuernermillu Eqqartuussiviup aalajangernera ersarilluartoq, immikkoortorisatsinnik tamanik isumaqatiginnittoq, Tal R-ip uagullu ilorrisimaarutigeqaarput. Tamatumalu suliamut inerniliisuunissaa tamatumalu Tal R-imut eqqumiitsuliortoqataanullu assingusumik pisoqannginnissaanut inerniliisuunissaa neriuutigaarput, nalunaarummi allassimavoq.
/ritzau/
