Eqqumiitsuliortoq tusaamasaq eqqaaniarlugu saqqummersitsineq
Tamanna malunnartinniarlugu Danmarkimi sumiiffinni assigiinngitsuni qulingiluani Sven Havsteen-ip eqqumiitsuliai soorlu Fyn-imi Johannes Larsen-ip katersugaasiviani, Lyngby-mi Sophienholm-imi, Bornholmimi Oluf Høst-ip katersugaasiviani, Savalimmiunilu Listasavn-imi immikkut saqqummersinneqarput.
Qasigiannguani Paaviap Oqaluffiata igalaavini eqqumiitsuliat - tassa glasmosaik-it - Sven Havsteen-Mikkelsenip suliarisimavai, Qassiarsummilu bronzemik eqqumiitsuliamik suliarinnittuulluni. Tamakku saniatigut Jens Rosing-ip atuakkiaanik "Sagn og Saga"-p aamma "Grønlandske Sagn"-ip assiliartaanik suliarinnittuuvoq, Gustav Holm-illu atuakkiaani "Sagn og Fortællinger fra Angmassalik"-p assitaasa ilaannik suliarinnittuusimalluni.
Sven Havsteen-Mikkelsen-ip angutisiaa Ejnar Mikkelsen ilaatigut Islandiliarluni, Savalimmiuliarluni, Kalaallit Nunaannukarluni ilisimasassarsiorluni angalasarnermini ernersiani ilagisarsimavaa. Tamakku Sven Havsteen-ip sunnertiffigisimaqigai malunnarpoq, nunanilu avannarlerni tamani ataqqisaalluinartunngorsimalluni.
Aamma Sven Havsteen-Mikkelsenip 100-liinissaraluata malunnartinniarneqarneranut atatillugu inuunera pillugu filmiliortoqarsimavoq atuakkiarineqarsimallunilu. Atuagaq Mette Eriksen Havsteen-Mikkelsen-ip aaqqisugarivaa, ilaatigullu Sven Havsteen-ip Nunatsinnut angalatilluni ullorsiutai tigulaarillattaarfigineqarsimallutik.
