Eqqumiitsuliortoq sunniuteqarluartoq toqusoq
Eqqumiitsuliortoq Arnannguaq Høegh toquvoq. Taanna Eqqumiitsuliornermik Nuummi Ilinniarfimmi ukiorpassuarni pisortaavoq. Kalaallit eqqumiitsuliortut namminneq eqqumiitsulioriaaseqarnissaannik tassani aqqutissiuuttarsimavai. Eqqumiitsuliornermik Ilinniarfik pisortatut eqqumiitsuliortutullu 1991-imili ornigannaaraa.
Arnannguaq Høegh pillugu paasissutissat
Arnannguaq Høegh Qaqortumi 1956-imi inunngorpoq. Eqqumiitsuliortutut ilinniarnera tamatigoortuusoq, Naalakkersuisut eqqaaniutaanni allaqqavoq:
Kunstskolen i Holbæk (1975), Assiliartaliortaatsimik Ilinniarfik Kingait, Cape Dorset (1976), Nova Scotia College of Art and Design Halifax (1977), Kunstakademiet i København (1978-79 aamma 1981-82), Kunstakademiet i Oslo (1979-81), Kunstpædagogisk Skole, Kunstakademiet i København (1982-86).
Perorsaanermik Nuummi Ilinniarfimmi Qaqortumilu Ilinniarnertuunngorniarfimmi tamatuma kingorna, Eqqumiitsuliornermik Ilinniarfimmi 1991-imi pisortanngornissami tungaanut, ilinniartitsisuuvoq.
Inuusuttuulluni Bodil Kaalundimi ilinniartuuvoq, tamannalu eqqumiitsuliortuuneranut aallarniutaalluni.
Atuakkami KIMIK Ukiuni 20-nimi nammineq allappoq ima: ”Ilinniarnerma periutsinik grafikkimik, litografiimik, dybtrykkimik, serigrafiimik, foto – aamma videomik eqqumiitsuliornermik, igalaaminernik ujaqqanillu allaliornermik, marriornermik, marrarnik ujaraasialerinermik, qalipaanermik, mixed medie-mik il.il. sulinermut isertippaanga.” Arnannguaq eqqumiitsuliaminik assigiinngitsorpassuarnik 1972-imili saqqummersitsisarsimasoq, atuakkami tassani allaqqavoq.
Tusarfik: Naalakkersuisut
Kalaallit eqqumiitsuliortut peqatigiiffiata, Kimiup, siulittaasuata Arnannguaq Høegh sakimmigissaqaa.
- Akornatsinniikkunnaarnera taassaanngilaq, eqqumiitsuliaanilli kingornussavut, kingulliarsunnit isumassarsivigineqartuarsinnaasut, tunissuterujussuupput.
Kimiup siulittaasua, Miki Jacobsen, taama oqarpoq.
Eqqumiitsuliortup Miki Jacobsenip Arnannguaq Høegh meeraallunili ilisarisimavaa. Arnannguaq Høeghip toqunera taassumunnga aammali eqqumiitsuliortartut silarsuaannnut annaasarujussuuvoq.
- Eqqumiitsuliai nunani tamalaanisulli qaffasissuseqarput, ilinniarsimanerinnani pinnagu, aammali eqqumiitsuliornermik piginnaasaqarluarnini pillugu, taanna oqarpoq.
- Eqqumiitsuliornermik Ilinniarfimmi 1991-imili pisortaanermini kingulliarsunni eqqumiitsuliortunngorlaanut tamatumalu saniatigut nunatsinni eqqumiitsuliornermik aallussisoqarnerulerneranut Kimik aqqutigalugu sunniuteqarluarpoq. Nunatsinni eqqumiitsuliornermik pitsanngorsaaqataavoq.
Kimimmeersoq Miki Jacobsen Arnannguaq Høeghip eqqumiitsuliornermik ilisimasaqarluarneranik ujariatsilereerpoq.
- Eqqumiitsuliorneq pillugu oqaloqatigiinnitsinni eqqartueqatigiinnitsinnilu tunniutinnnarumasanngilaq. Eqqumiitsulioriaatsit sorliit pitsaanersut sorliillu pitsaannginnersut ersarissumik isummertarpoq. Eqqumiitsuliortulli ataasiakkaat nammineq eqqumiitsulioriaasiinut aamma ataqqinnittupilussuulluni. Eqqumiitsuliornermi kusanarluinnartunik eqqumiitsuliornissaq pingaartilluinnarpaa.
- Arnannguaq Høeghip ilaqutai qanigisaalu tamaasa Kimik sinnerlugu misiginneqatigingaarpakka, Miki Jacobsen oqarpoq.
Arnannguaq Høeghip kalaallit ilisarnaataat nunatsinnilu pinngortitaq eqqumiitsuliornermini isumassarsivigisarsimavai.
