Eqqumiitsuliortoq Frederik 'Kunngi' Kristensen 69-nik ukioqarluni toquvoq

Eqqumiitsuliortorsuuvoq ukiorpassuillu eqqaamaneqartussaavoq, Eqqumiitsuliortut peqatigiiffiata siulittaasua oqarpoq.
Frederik 'Kunngi' Kristensen qalipakkanik assilialiortartutut, taalliortutut, erinniortutut atuakkiortullu ilisimaneqarpoq Assi © : Kimik, Grønlands Kunstnersammenslutning
Allattoq Karline Platou, Anders Dall
novembarip 06-at 2021 18:30

Ukiorpassuarni eqqaamaneqartuassaaq.

Eqqumiitsuliortut peqatigiiffianni siulittaasoq Ivínnguak` Stork Høegh taama oqarpoq.

Frederik 'Kunngi' Kristensen qalipaasarnermigut, taalliortarnermigut erinniortarnermigut atuakkiortarnermigullu ilisimaneqarluarpoq.

- Eqqumiitsuliortut peqatigiiffianni ataqqinaammik ilaasortaraarput, inuk nunatsinnut eqqumiitsuliornerullu iluanut isumaqarluartoq annaavarput, inuiaqatigiinnut tunniussaanut qujangaarpugut, eqqaaneqarnera ataqqinartuuli, Ivínguak Stork Høegh oqarpoq.

Kunngi sivisuumik napparsimareerluni tallimanngormat toqukkut qimaguppoq, parkinsonimik sivisuumik nappaateqartuuvoq. Sermitsiaq.AG taama allaaserisaqarpoq.

Kunngi qummut isigisassaavoq

Frederik 'Kunngi' Kristensenip eqqumiitsuliai Aqqaluk Lyngep aamma oqaaseqarfigai:

-Frederik Kristensen, Kunngikkut 1952-imi Nunatsinnut tikeraartut inunngoramili atini taaguutinilu pivai, siuliminilli malitassaqaqaaq eqqumiitsuliornikkut piginnaanilissuit akornanniikkami.

Eqqumiitsuliornermik Ilinniarrfik aqqusaarsimavaa, pissarsiffigilluakkaminik. Kunngi nuannaartunartuuvoq eqqumiitsuliorneq tamakkiisoq piginnaaneqarfigigamiuk, taalliortoq, erinniortoq qalipaasorlu.

Kunngi avatangiisini eqqarsaatigilluarlugit paasiniaqqissaartarpai. Qalipaatit immikkut naleqartippai assullu eqiingaffigalugu qaamanerup taartullu imminnut avissaarutaat titartaanermini ersersinniartarlugu.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk