Eqqumiitsuliornikkut suliaq nutaaq: Hans Egedemut allakkat
Hans Egede Illuerunnernut 1721-mi nunassereerluni 1728-imi Godthåb nunasiaatigut tunngavilerpaa. Taamanerniillu ukiorpassuit qaangiutereerneranni nunasiaataasimaneq eqqartorneqaleraangat Hans Egede suli oqallisaasarpoq. Palasimut ajoqersuiartortitamullu Hans Egedemut e-mailertoqarsinnaalernissaanik isumassarsisup Juaaka Lyberthip, nipilersornerup silarsuaani, atuakkiortutut politikeeritullu ilisimasatta isumassarsiani ima tunngaveqartippaa:
-Taamatut isumassarsininnut peqqutigivara takusarartsigu Hans Egedep eqqaassutissaanut inuit allakkusuttorujussuusartut. Ilai eqqumiitsuliatut suliaallutik ilaallu immaqa serlersaarisutut suliatut taaneqartarlutik. Kisianni malunnarpoq inuit uummammioqartorujussuusut Hans Egedemut anerusutaminnik.
Inuit isummatik allaganngorlugit Hans Egedemut e-mailikkut nassiussaat inunnit tamanit siunissami atuarneqarsinnaalersikkusuppai:
- Taava eqqarsarpunga soormi Kalaallit Nunaanni najugaqartut periarfissikkutsigit uummammiutik Hans Egedemut allaqqullugit? Taava katersoriarlugit atuakkiatut saqqummersinnissaat isumagissangaluarpara. Taavalu isiginnaangassiornissaq 2028-mi takutinneqarsinnaasumik suliariniarlugit pilersaarutigaakka.
Akerleriissutaasartoq
Hans Egede ukiut ingerlanerani kalaallinit danskinillu assigiinngitsutigut saqqummiussuunneqartarpoq. Ilaasa nunasiaateqarniartutut, kalaallillu kulturitoqaannik nungusaaniartutut isumaqarfigigaat, allat kalaallit kristumiunngunngikkallamik ileqquinik, soorlu akerariittarnermik, akiniaqattaattarmik, ilisiitsunik, innarluutilinnullu naakkittaatsumik pissuseqarnermik imalinnik atorunnaarsitsisutut qujaniarfigisarlugu.
Ukiunilu kingullerni Hans Egedep eqqaassutissaa inuit ilaannit allamut nooqquneqarpoq. Taamaattumik suliap upperisarsiornermut politikimullu attuumassuteqassanngitsoq Juaaka Lybeth oqarpoq.
- Atuakkiorluni eqqumiitsuliornertut suliarineqartussatut takorloorpara. Imatut eqqarsanngilanga politikkikkut oqariartuuteqassallunga uanga nammineq, imaluunniit upperisarsiornermut tunngasunik oqariartuuteqassallunga. Kisianni apeqqutaasorujussuussaaq soorunami inuit sunik qanorlu allakkusunnersut, aamma taakkua killilersorneqassanngillat isummersornissaminnut.
Juuaka Lyberth oqarpoq Hans Egedemut allattussat allakkamik avammut saqqummersinneqarsinnaanissaat akuerisariaqassagaat atuakkiassamut ilanngunneqarsinnaasussaammata.