Eqqumiitsulioriaaseq avammut ammasoq

”Kalaallit eqqumiitsuliortut nunarsuarmut ammaakkaluttuinnarput”, taama naliliivoq eqqumiitsulianik naliliisartoq Inuk Silis Høeghip ”Qamuteralak Aappilasumik” qulequtserlugu saqqummersitsineranut takuniaasimasoq.

- Soqutiginarluinnarpoq kalaallit eqqumiitsuliortui kinguaariit nikinneranni kingulliusut, avammut mattusimanerujussuarmik ammaassisimasutut innerat. Ukiorpassuarni kalaallit inuiannut imminermut tunngasuinnarnik eqqumiitsuliortarput. Maannali kalaallit eqqumiitsuliortui avammut isiginnillutik eqqumiitsuliortalersimapput, ullutsinninngaanneersunik eqqumiitsulioriaaseqarlutik. Taakku paaserusulersitsipput kalaallit kinaasusaasa ullutsinni atuuttup qanorpiaq inissisimaneranik, taama naliliivoq eqqumiitsuliornermut tunngasunik aviisimik aaqqissuisoq Ole Lindboe.

Taanna isumaqarpoq, kalaallit inuusuttut kinguaariit nikinneranni eqqumiitsuliortut nutaat takutikkaat inuiaat akornanni avammut ammanerulersoqarsimasoq, nutaamillu inuiattut avammut ammasumik kinaassusinittoqarsimasoq.

Ole Lindboe Inge S. Rasmussenimit apersorneqarluni aperineqarpoq, eqqumiitsuliat pineqartut eqqumiitsuliatut pitsaasutut nalilersinnaanerai.

- Ilumut taamaalluinnarpoq, saqqummersitsisup ilisimalluinnarpaa suna suliarisimanerlugu, suliarilluagarujussuuppummi, isumassarsiullaqqilluinnartullu inuup suliarisimavai.

Ole Lindboe aperineqaqqippoq, inuiattut qilersorsimasumik eqqumiitsulioriaaseq ingerlatiinnarneqarpat qanoq naliliissagaluarnersoq.

- Tamanna allanngortitsinaveersaarneruvoq avammut mattusimasoq pikkunaatsorlu. Tassami eqqumiitsuliorneq siammasissorujussuuvoq, nutaaliornernillu ujaasinerusussaalluni taannaavorlu eqqumiitsuliornerup iluani pingaarnerpaatut nunarsuarmi sumiikkaluaruttaluunniit paasineqartussaq. Eqqumiitsuliorneq nassuernermik aamma imaqarpoq, unalu saqqummersitsineq nassuerneruvoq, taamaattumik ingerlariaqqinnerusoq, Ole Lindboe taama naliliivoq.