Eqqumiitsulianik saqqummersitsivissaq nunanit allanit soqutigineqarluarpoq

Nunatta Eqqumiitsulianik Saqqummersitsivissaa nigaliusatut nunaminertamut toqqavimminut ilassuuttunngorlugu ilusiligaq, avammut saqqummiunneqarnermi kingorna ullut pingasut qaangiunneranni tusagassaqartitsivinnit 50-init amerlanerusunit nunani assigiinngitsuni 15-ini allaaserineqaqattaarpoq.

Eqqumiitsulianik Saqqummersitsivissaq, Danmarkimi tusagassiorfinni sammineqarluarnermi saniatigut, Europami tusagassiorfinni tamangajanni sammineqarpoq, aammattaarli tusagassiorfinni, ilaatigut USA-mi, Hongkongimi, Indiami, Igitsinimi aamma Mexicomi, ajugaasut siunnersuutaat assitalerlugu saqqummiunneqartarpoq.

- Ajugaasutut toqqarneqartup taama alutorsaatigineqarnera soorunami nuannaajallannaqaaq. Taamatut uitsatigineqarnerata piffissami tulliuttumi, illussanik titartaasarfik BIG peqatigalugu, pilersaarusiap immikkukajaaq ittup sananissaanut aningaasaliisussarsiornissatsinni isumallualersippaatigut, Eqqumiitsulianik Saqqummersitsivissatut pilersaarutip imminut pigisup siulersuisuini siulittaasoq, Josef Motzfeldt, oqarpoq.

Unammisitsinermi ajugaasup suliaa unammeqataasut allat suliaat peqatigalugit Københavnimi Illu Atlantikumi qanittukkut takuniarneqarsinnaassaaq. Maannakkullu Nuummi Rådhusimi takuniarneqarsinnaalluni.