Eqqissiviilliornerit suli ingerlajuarsinnarput

Naak maanna inuttaasut aneqqusaanngikkaluarlutik, suli tassa akerliussutitsimik takutitsiuarsinnarput. Akerliussutitsimillu takutitsisut suli suaarutigaat, Igitsinimi Naalakkersuisut tunuassasut.

Maanna akerliussutitsimik takutitsinerup kingorna inuit 150-it missaanniittut toqutaasimatinneqarput, taamak arabiamiut nutaarsiassaqartitsiviat franskit nutaarsiassaqartitsivianut AFP-mut nalunaaruteqarsimavoq. Inuilli 150-it taamaallaat toqutaasimanissaat nalornisigineqarpoq, akunnerup naanerani inuit arlaqartut toqutaasimammata, taamaammat inuit qasserpiaat toqutaasimanissaat suli nalornisigineqarpoq.

Qallunaat Igitsinimi takornarissat maanna nunamiit qimagussortinneqarput, sumiiffinnilu aamma perulluliorfiunngitsuniikkaluilluuniit qimagussortinneqarlutik.

Maanna Danmarkimi Naalakkersuisut avammut oqaatigaat, inuit pisariaqanngitsumik Igitsinimukarniartut aallaqqunagit. Taamaasillutillu, qallunaat Igitsinimiittut immikkut timmisartumik attartukkamik ilaallutik, Danmarkimut utertinneqaqattaarlutik.

Maanna qallunaat 60-it missaanniittut suli Kairomi aallarsinnaajunnaarlutik utaqqipput, SAS-imiillu naatsorsuutigineqarpoq ullumi Kairomut aaneqassasut.

Danmarkimi Nunanut allanut ministerip Lene Espersenip naatsorsuutigaa EU-mi nunanut allanut ministeri, Bruxellimi ullumi naapeqatigissallugu, tassanilu oqaluuserissallugu Igitsinimi pissutisit.

- Nalunaarutigissavarput EU-minngaaniit Igitsinimi pisoq annertuumik akuliuffigineqassasoq. Tassani aningaasatigut, inooriaasitsigut politikkikkullu EU-miit qisuariartoqarnissaa oqariartuutigissavarput.

Lene Espersen Danmarkimi statsministerip akunnerup naanerani oqaaserissaa aamma taperserpaa.

Lars Løkke Rasmussen akunnerup naanerani ima oqariartuuteqarpoq.

- Arabiamiut neriuutigaat politikkikkut aningaasatigut inooriatsimikkullu allanngortoqarnissaa, tamannalu aamma ataqqineqartariaqarpoq Lars Løkke arfininngormat TV2 Newsimut taamak oqarpoq.