Eqqissiviilliornerit annikitsuinnaasimapput
Qaqortumi tasersuup sikua sapaatip akunnera kingulleq saalisimanini pissutigalugu pisuffigeqqusaajunnaartoq, isseqqilernerani navianarunnaartoq politiit oqatigaat.
Narsami angerlarsimaffinni eqqissiviilliornerit imigassartorsimanermik aallaavillit arfineq-pingasut politiinut nalunaarutigineqarput.
Maniitsumi aappariit isumaqatigiinnginnera´ta kinguneranik angutip igalaaq nivaattamik sequmimmagu politiit kalerrinneqarput. Angulli allamik ajortuliaqarsimanngikkuni akiligassinneqaratarsinnaasoq, Maniitsumi politeeqarfimmi aqutsisoq Eigel Lyberth oqarpoq.
Tallimanngormat januaarip quligiluaanni, unnukkut arfernup qaangeraa Qeqertarsuatsiaani angut 60-inik ukiulik angalaarsimatilluni angerlarsimanngitsoq kommunefogedimut nalunaarutigineqarpoq. Ujaasineq aallartinneqarpoq. Angulli akunnerit marluk qaangiummata motooriminik ajutoorsimasoq ajunngitsorlu nassaarineqarpoq.
Arfininngornerup unnuaani marlup qaangeraa nukappiaraq 15-inik ukiulik ukioqatiminit pingasunit imigassartorsimasunit persuttarneqartoq Nuummi politiinut nalunaarutigineqarpoq. Nukappiaraq tilluarneqarlunilu isimmissartissimavoq. Suliaq suli paasiniaaffigineqarpoq.