Eqqillit kiisami premierministeri ataatsimeeqatigilerpaat
Canadap annersaani qaammatip aappaa avillugu ullut tamaasa akerliussutsimik takutitsisoqartareersorlugu Canadamiut premierministeriata Stephen Harperip Canadami eqqillit høvdingiinik arlalinnik ullumi kiisami ataatsimeeqateqarnialerpoq. General-guvernørittaaq, Dronning Elisabethip aallartitaata, ataatsimeeqatiginissaa arlalinnit piumasaqaatigineqarpoq, qanga isumaqatigiissutaasarsimasut tuluit kunngiannut isumaqatiissutaasimanerat pissutigalugu.
Akerliuneq nunamut tamarmut siaruaassimavoq, Inuilli akuuallaarsimanngillat, Canadami naalakkersuisunut attaveqarnerat eqqissisimanerummat. Inuit Tapiriit Kanatami præsidentiata, Terry Audlap, tweetserluni allappoq Inuit akerliussutsimik takutitsinerit tapersersoraat, saariarfissaaruteqqaneq ilungersortumik iliuuseqartariaqarnermik kinguneqartarnera Inuit nalunngimmassuk.
Canadami naalakkersuisut eqqillillu akornanni attaveqarneq Inuit attaveqarfigineranit ilungersunarnipilussuuvoq. Métisit eqqillittullu inissisimanngitsut millionip ataatsip missaaniittut saniatigut eqqillit naggueqatigiikkuutaat assigiinngitsut 635-iupput.
Eqqillit nuna tamakkerlugu akerliussutsimik takutitsinerminni MAANNAKKUT allannguisoqartariaqarneranik oqariartorfiupput, taamatullu pisoqanngippat siunissami aporaannerit arlallit ingerlanniarneqarlutik.
Ullumikkut ataatsimiinneq allanngorfiussaaq, høvding Shawn Atleo CBC Newsimut oqarpoq, maannalu nunap inuiisa canadamilu naalakkersuisut akornanni attaveqatigiinnermi allannguinerit tunngaviusut ingerlanneqartariaqarnerat oqaatigalugu.
General-guvernør David Johnstonip politikkimut toqqaannartumik akuliuteqqusaannginnini pissutigalugu nunap inuiinik høvdinginit siuttuuffigineqartunik unnugu Ottawami angerlarsimaffimmini naapisimaaqateqarniarpoq.
