Eqqartuussivinni ilinniarsimasut illersuisalissapput

Illersuisuusartut ilaat inatsiseqarnermut eqqartuussiveqarnermilu ilisimasariaqakkanik misilittagaqanngillat, taamaattumillu illersuisut ilinniartinneqartalissapput, ukioq 2009ip tungaanut, taamanikkussamullu taaguuteqalissapput eqqartuussivinni illersuisut ilinniarsimasut.

Nunatta eqqartuussiviani eqqartuusseqataasartoq illersuisullu ilinniartinneqarnerannik ingerlatsisusssaq Thomas Trier Hansen aperaarput

Sooq illersuisutut ilinniarneq pisariaqarnersoq taannalu oqarpoq,

Kalaallit Nunaanni illersuisutut suliaqarneq ukiorpassuarni ingerlanneqarsimavoq.

Kalaallit Nunaanni pinerluttulerinermut inatsimmi ukioq 2010mi atuutilersussami piumasaqaatigineqarpoq, eqqartuussivinni illersuisuuniaraanni ilinniarsimasuunissaq, taamaattumillu illersuisuinik ilinniartitsineq aallartinnialerparput, Thomas Trier Hansen oqarpoq.

Eqqartuussivinni illersuisuusartut illersuisutut sulinerat ajunngila ? Thomas Trier Hansen aperaarput.

Illersuisut illersuisutut sulinerat nalinginnaasumik ajunngilaq, ikittuinnaalli ilinniagaqarsimasuupput, illersuisutullu sulinerminni sulisinnaanerat ajunnginnersoq nalaatsorinnaasinnaavoq. Ilaqarput sungiussisimasunik misilittagaqarluartunik pikkorissunillu, ilaqarpulli aamma sungiussisimanngitsunik misilittagaqarpallaanngitsunillu, tamannalu ajornartorsiutaasarpoq, tassa eqqartuussinermi sammineqartut naammattumik paasineqarneq ajormata. Illersuisutut misilittagaqarluartut suut apeqqutigissanerlugit ilisimaarilluartarpaat, misilittagaqanngitsulli ilinniagaqarsimanngitsullu suut apeqqutigissanerlugit pikkoriffigivallaanngilaat, eqqartuussinermi ingerlatseriaatsit nalusarpaat, illersukkamillu illersornissaannut tunngavilersuutissaminnik amigaateqartarlutik, Thomas Trier Hansen oqarpoq. Illersuisut misilittagaqarpallaanngitsut unnerluussisunut eqqartuussisunullu inissisimanertik ilisimaneq ajorpaat, taamaattumillu illersuisuisuusartunik ilinniartitsineq pisariaqarpoq, illersuisut iliniartinneqarnissaannik suliaqartoq Thomas Trier Hansen oqarpoq.

Illersuisutut ilinnialernissamut qinnuteqarfissaq ulloq kingulleq aqagu sisamanngornermi 10 januaari. Ilinniarneq oktobarip qaammataani aallartissaaq qaammammillu ataatsimik sivisussuseqassalluni. Nuummi Ilulissani Qaqortumilu ilinniarnerit ingerlanneqassapput. Naatsersuutigineqarpoq illersuisut 30-it ilinniartinneqarnissaat.