Eqqartuussivik: Pinerluuteqarsimasunut inissiisarfik unioqqutitsivoq
Eqqartuussissuserisup Finn Meinelip illersugaa tigummigallarneqarnermini ulluni 31-ini pinerluuteqarsimasunut inisiisarfimmiitilluni isumannaallisakkamiikkami ullorsiutiminut ima allappoq.
"Ullaaq nalunaaqqutaq arfineq marlunut ullaakorsiutissannik aallerpunga, ineeqqanni ullaakorsioreerama innaqqippunga, ullup qeqqanut nerinissama tungaanut. Ullup qeqqarsioreeruma sineqqissinnaavunga fjernsynerlungaluuniit, unnukkorsiornissama tungaanut".
Eqqartuussisusserisup sullitaata ullua naliginnaasoq tassa taama ingerlakkajuppoq.
Pineqartup inoqatiminik oqaloqateqarnissamut periarfissatuaraa inisiisarfimmi ineeqqami allamik pulaartoqarneq imaluunnit pulaarneq.
Pinerluteqarsimasunillu Isumaginnittut tigummigallagaasumik pinnernerat tassa kisimiitillugu mattussinermut assigusuusoq, Nuummi eqqartuussiviup aalajangerpaa.
Inatsimmili allassimavoq, eqqartuussiviit kisimik kisimiitillugu mattussinissamik aalajaniisinnaasut.
- Pineqartup matoqqasumi parnaarussaaqqasimanera, eqqunngitsuliornerusoq eqqartuusiviup aalajangiuppaa. Eqqartuusiviup oqaasia ima paasisariaqarpoq, tigummigallagaasoq inunnit allanit ungavarsimatinneqassanngitsoq allatullunniit eqqissisimanissap isumannaalisaanerulluunniit pisariaqartiligaanit ajornerusumik killilersorneqassanngitsoq. Tassalu eqqartuussivik isumaqarpoq, angut taanna inimi isumannaallisakkamiitinneqartariaqarsimanngitsoq, eqqartuussissuserisoq Finn Meinel oqarpoq.
Inissiisarfimmi inimi isumannaallisakkamiititsineq immikkoortitsilluni mattussinerunngitsoq Pinerluttunnik isumaginnittoqarfik tunngavilersuigami oqarpoq tigummigallagaasut ineeqqani imminnut pulaartarsinnaasut unnerlugit. Kisianni taamaaliorneq inatsisinik unioqqutitsinerusoq eqqartuussisuserisoq Finn Meinel oqarpoq .
- Eqqortuusinnaanngilaq inatsisit avaqqutaaginnarlugit matoqqasumik parnaarussinissaq. Uani matoqqasumik parnaarusseriarlutik oqarput matoqqasumik parnaarussinatik, pissutigalugu tigummigallagaq inunnik allanik takusaqarnissamik periarfissaqarmat. Tassami ineeqqami ulloq unuarlu kaajallallugu kisimiitsitaanermi imaluunniit isersimaqateqarluni kisimiitsitaanermi ajoqusernerit assigiinngitsuupput,
Finn Meinel taama oqarpoq.
Aalajangerneq pinerluttunik isumaginnittoqarfiup illuatungilerpaa Nunattalu Eqqartuussivianut ingerlateqqilllugu, tassanilu aalajangiinissaq utaqqineqarpoq.
Nunatta Eqqartuussiviata aalajangernera tunngaviusumik aalajangiinertut taamalu malineqartartussatut naatsorsuutigineqassasoq, Finn Meinel isumaqarpoq.
- Eqqartuussinerli aamma tassani atuuttussanngortinneqarpat, taava pinerluutieqarsimasunik isumaginnittut tigummigallagassanik taama pinnittarnertik unitsittariaqarpaat, eqqartuussissuserisuuneq Finn Meinel taama oqarpoq.
Taassuma sullitani allat, assigusumik pineqarsimasut arlallit, sinnerlugit ukiuni kingullerni maalaartarsimavoq. Maalaarutaalu arlallit nunap immikkoortuini eqqartuussivinni, Nunatta Eqqartuussiviani, politimestereqarfimmi Pinerluuteqarsimasunillu Isumagfinnittuni aalajangiivineqarnissamut utaqqipput.
Nunatta eqqartuussiviata aalajangiinissaa sioqqullugu Pinerluttunik Isumaginnttoqarfimmi pisortaq Thomas Nicolajsen pineqartoq pillugu oqaaseqarusunngilaq.
