Eqqartuussivik nittartagartaarpoq

Eqqartuussivimmut attaveqarnissaq pisariaqalersinnaasarpoq, maannalu Nunatsinni eqqartuussisoqarfiit nutaamik nittartagartaarput, innuttaasullu eqqartuussivimmut atassuteqarniartut taamaalillutik ikiorserneqarsinnaalerlutik.

Assersuutigalugu eqqartuussivimmut aggersarneqaraanni qanoq iliortoqassanersoq tassani paasineqarsinnaavoq. Tassani aamma eqqartuussisoqarfiit qanoq aaqqissuussaanerat nassuiarneqarpoq, eqqartuussivimmit qanoq ikiorserneqarsinnaaneq kiisalu inatsisitigut siunnersorneqarneq aamma aningaasartuutaanngitsumik suliassiinerit allarpassuillu paasissutissiissutigineqarlutik.

Soorlu aamma eqqartuussisoqarfinni ilinniagaqarusukkaanni suliffissarsioraanniluunniit, atorfiit inuttassarsiuunneqartut ilitsersuutillu aamma nittartagartaami nanineqarsinnaapput.

Kalaallisut ujaasiniaraani iserfissaq tassaavoq eqqartuussivik.gl qallunaatullu ujaasiffissaq tassaalluni domstol.gl

Apeqqutiginiakkasi nittartakkami akissutissarsinngikkussigik, eqqartuussivimmut atassuteqarnissaq periarfissaajuaannarpoq.