Eqqartuussiveqarnerput nutarterneqarsimasoq ukiortaami atuutilissaaq
Inuit eqqartuussivilersuussiniaraangamik akiliisalissapput, tassa ukiortaamiit 500 koruuneerluni saqitsaannermik suliakkiisoqartalissaaq - tassa qallunaatut civilsag-imik taaneqartarpoq, 300 koruunilillu akiliilluni eqqartuussinermi aningaasanut piumasaqarnermik naammassiniaasoqarsinnaanngussalluni, tassa qallunaatut fogedsag-imik taaneqartartoq.
Assersuutigalugu qatanngutippit 100 koruuninik akiitsoqarfigippatit eqqartuussivilersuullugulu utertinniarsarigukkit taava 300 koruuninik akileeqqaassaatit, taamaattoqalerneralumi soorunami nangaanartoqartinnerulissavat, ilami siornatigut suliassat taamaattut naammattoortareersimagatsigit, taamaammat neriuutigaarput akiliisalernerup tamakku mikisuarsuit ikinnerulertissagai, eqqartuussisoq Thomas Trier Hansen taama oqaaseqarpoq.
Avinniarnermulli tunngasut, angajoqqaat meeralerngusaattarneri, taarsiiffigitinniarluni eqqartuussivilersuussinerit kiisalu nammineq eqqartuussivilersuussisinnaanerit, qallunaatut fri proces-imik taaneqartartut akeqartinneqartassanngillat, eqqartuussivilersuussinermimi ajorsartup eqqartuussivilersuussinermi akiliutaasartut akilertalissammassuk.
Aningaasamik piumasaqarnermik naammassiniaasoqartillugu - tassa fogedsag-eqartillugu - politiit suliarisartangarisimasaat eqqartuussiviit isumagisarilissavaat.
Illunit anisitsinerit politiit suli suliassarissavaat, kisiannili aningaasanut tunngassutilinnik naammassinaasoqartillugu uagut eqqartuussivimmiittugut isumagisalissavarput.
Aamma eqqartuussiveqarneq pitsanngorsaaffigineqassaaq, tassami eqqartuussisut illersuisullu tamarmik pikkorissarneqartassammata. Aamma kredsdommeriusartut aalajangersimasumik suliffeqalissapput, tassa siornatigut assersuutigalugu ilinniartitsisutut ullaap tungaani suleriarluni ualikkut eqqartuussisutut sulisarneq atorunnaassaaq.
Aamma inuiaqatigiinnut kiffartuussinissamik pineqaatissinneqartalerneq nutaarsiassatut taaneqarsinnaavoq.
Inuiaqatigiinnut kiffartuussinissamik pineqaatissiisoqartalissaaq, assersuutigalugu utoqqaat illuini sullissisussatut assersuutigalugu 60 tiiminik pineqaatissiisoqartalissaaq. Tassa pineqaatissinneqarsimasoq assersuutigalugu sapaatit akunnerisa naanerini ullaakkut arfineq pingasuniit ullup qeqqata tungaanut inuiaqatigiinnut sullissisalissaaq.
Tigusarineqarsimasut immikkut parnaarussaasarneri - tassa allanut attaveqarsinnaajunnaarlugit - politiit namminneq siornatigut aalajangiiffisaraluaraat eqqartuussisup siunissami aalajangigassarilissavaa.
