Eqqartuussiveqarneq tigusinnaavarsi

Folketingimi ilaasortaq aammalu Namminersorneq pillugu Isumalioqatigiissitarsuarmi ilaasortaasoq, Niels Helveg Petersen, oqarpoq, Kalaallit Nunaat piumaguni; Eqqartuussiveqarneq, politeeqarneq kiisalu parnaarussiveqarneq piffissami aggersumi tigusinnaagai.

Pingaarnertut Namminersorneq pillugu Isumalioqatigiissitat suliaat tassaavoq niuernikkut amerlanerusunik periarfissarsiorneq, allanik aamma imaqarpoq soorlu tapiissutit ataatsimoortut pillugit isumaqatigiissusiorneq aningaasanullu tunngassute-qartut allat. Pingaarnertullu isigisinnaassara tassaavoq niuernikkut periarfissanik allanik ammaassisimaneq.

-aperineqarami iluaqutaasinnaasut pillugit assersuusiulaarsinnaannginnerluni, akivoq;

Namminiilivinnissamik inatsit nutaaq, uanga isumanga malillugu iluaqutaasinnaasoq tassaavoq; Kalaallit Nunaat nammineq piumaguni oqartussaaffiit allat Danmark-imiit Kalaallit Nunaannut nuussinnaagaat.

Soorlu; Eqqartuussiveqarneq, politeeqarneq kiisalu parnaarussiveqarneq. Maannakkulli oqaatigisinnaanngikkallakkanik periarfissanik allanik missigiummi suliarisatsinni suliaqarpugut.

Isumalioqatigiissitap suliaa september-imi naammassineqassaaq tassanngaaniilu ataatsimiititaliarsuup inassuteqaatai folketingimut kiisalu inatsisartunut suliareqqinneqarnissaminut ingerlatinneqassapput.