Eqqartuussisut nutaat aqqanillit
Eqqartuussisunngorniartut ilinniartitaanissaannik piumasaqaateqartoqarnerata kingorna, aatsaat siullermeerluni eqqartuussisunngorniartunik soraarummeersitsisoqarpoq. Taamatut piumasaqarneq eqqartuussiveqarnermi aaqqissuusseqqinnerup ukiortaamiit atuutilerneratigut atuutsinneqalerpoq.
Eqqartuussisunngorniartut ilinniarnerminni inatsisilerinermik aamma suliassanik isumaginninnermik piginnaaneqalerput, sulinerminni iluaqutigisinnaasaminnik. Aamma eqqartuussisutut sulineq siusinnerusukkut saniatigooralugu suliffiugaluartoq, maannamiit piffissaq tamakkerlugu suliffiulissaaq.
- Taamatut atorfinitsitsineq aamma eqqartuussisut ilinniarluarsimasut suliassamut ilisimasaqarlualernerannik misilittagaqarnerulernerannillu kinguneqassaaq, tamannalu eqqartuussivinni aalajangiiniartoqartillugu pingaartuuvoq, Kalaallit Nunaanni Eqqartuussivimmi eqqartuussisoq Thomas Trier Hansen, oqarpoq.
Eqqartuussisunngorniarluni ilinniarneq ukiunik pingasunik sivisussuseqarpoq. Piffissami tassani eqqartuussisunngorniartut modulit arfineq-marluk, tamarmik immikkut sapaatip akunnerinik pingasunik sisamanilluunniit sivisussuseqartut ingerlappaat. Modulit avataasigut eqqartuussisunngorniat eqqartuussisuugallartutut sulipput, annertusiartortumik akisussaaffilerneqarlutik.
Eqqartuussisutut taagorneqalernissartik sioqqullugu Dommerrådimit inassutigineqarlutik Domstolsstyrelsimit akuerineqaqqaassapput.
