Eqqartuussisuserisoq: Hans Enoksen politiinut tunniunneqartariaqarpoq

Naalakkersuisut siulittaasuata Hans Enoksenip naalakkersuisuni ilaasortat akisussaaffii pillugit unioqqutitsisimasutut, tassa ministeritut akisussaaffimminik unioqqutitsisimasutut inatsisartunit politiinut tunniunneqartariaqarpoq. Demokraatit eqqartuussisuserisuat taama oqarpoq.

Hans Enoksen aalisarnermut piniarnermullu siorna naalakkersuisuugallarnermi nalaani aalisarnermut pisortaqarfimmi atorfilittami innersuussutaat akimorlugit iliuuserisimasai, Demokraatit eqqartuussisuserisuanit, Gert Drew Jensenimit misissorneqarsimavoq.

Demokraatit oqarput Gert Drew Jensen Nuummi eqqartuussisuserisoq Wilhelm Malling sullinnikuummagu nunatta inatsisaanik ilisimasaqarluartoq.

Naalakkersuisutut akisussaaffimminik unioqqutitsisimasutut kiisalu aalisakkanik pisassiinermi eqqunngitsuliorsimanera Hans Enoksenip akisussaatinneqarsinnaanera mattunneqarsinnaanngitsoq, Gert Drew Jensenip oqaaseqaammini allaaseraa.

Eqqartuussisuserisup naliliinera Namminersornerullutik Oqartussat Inatsisilerinermut Allaffeqarfiani Naalakkersuisut siulittaasuata suliarititaanit killormorluinnaavoq, Hans Enoksen tassani pinngitsuutinneqarmat.