Eqqartuussineq naammassivoq

Angut danskiusoq 53-inik ukiulik ikiaroornartumik 21,4 kiilumik eqqusseriaraluartutut Nuummi Eqqartuussivimmi eqqartuunneqarpoq. Angut ukiuni pingasuni affarmilu pinerluuteqarsimasunik inissiisarfimmiittussanngortinneqarpoq, tamatumalu saniatigut aningaasat 690.000 koruunit arsaarinnissutigineqarput.

Angut paasineqarpoq ikiaroornartoq hashi 10 kiilumit annertunerusoq pallimi qarmasissiaaqqanik imalimmi, Nuummi qalipaasut ittuannut nassiussassamiittoq, Aalborgimi politiit, akitsuusiinermullu sulisut, nassaarimmassuk. Politiit hashi qarmasissiaaqqanik taarserpaat, pallilu annguffissaata tungaanut malittaralugu.

Taama pisoqareermat Nuummi politiit misissueqqissaarput, uppernarsaatissanik ujaasillutik. Nassaaraallu ikiaroornartoq hash 6 kiilu, aningaasallu 308.000 koruunit.

Angut ikiaroornartumik hashimik 29 killumik eqqusseriaraluartutut siullermik eqqartuunneqaraluarpoq, ukiuni sisamani pinerluuteqarsimasunik inissiisarfimmiittussanngortitaalluni, aningaasanillu 1,8 millioni koruuninik arsaarneqarluni. Eqqartuussut tamanna angutip Landsretimut ingerlateqqittussanngortippaa, sivikinnerusumillu tassa inissiisarfimmiittussanngorluni, ukiuni pingasuni affarmilu, tamatumalu saniatigut aningaasat 690.000 koruunit arsaarinnissutigineqarput.