Eqqartuussaanini suliareqqitassanngortippaa
Ilassinnissutinik atornerluineraaneq decembarip pingajuannili eqqartuussivimmi suliaralugu aallartinneqarmalli illersuisoq pinngitsuutitsiniaraluartoq, unnerluussisup piumasaa Nunatta Eqqartuussiviata taamaalilluni akueraa. Nunatta Eqqartuussisuunera Søren Søndergård Hansen ullaaq qulingiluanut qiteqquttoq ima oqaaseqarpoq:
- Unnerluutigineqartoq naalakkersuisunut ilaasortaasimasoq Jens Esaijas Napãtôk’ eqqartuunneqarpoq qaammatini sisamani eqqartuussaasimasunut inissiisarfimmiittussanngortinneqarluni.
Nunatta Eqqartuussisua taama oqareerluni, oqarasuaatikkut unnerluutigineqartumut Jens Napãtûmut illersuisuanullu Phillip Comerfordimut attavit qamippai, sapaatip-akunnerinik sisamanik eqqartuussut akuerissanerlugu eqqartuussivimmulluunniit qulliunerusumut Østre Landsretimut ingerlatissanerlugu eqqarsarfissaqartillugit.
Jens Napãtûlli atini salinneqaqquaa Østre Landsretimullu suliaq ingerlatitseqqitassanngortinniarlugu:
- Illersuisora isumasioqatigaglugu, maannakkut ingerlateqqinnissaa siunniupparput, eqqartuussivimmi ilumoortumik ingerlanneqarnissaa kissaatigigatsigu, Jens Napãtôk’ nassuiaavoq.
Kissaatertillu ullup ingerlanerani Nunatta Eqqartuussivianut saaffiginnissutigissavaat.
- Østre Landsretimi suliaq eqqortumik suliarineqartariaqarpoq, soorlu nutserisoqarnikkut politiillu apersuisimanerat aallaavigalugu assigiinngitsut ataasiakkaarlugit taakkartorsinnaanngilakka, kisianni inatsisit toqqammavigalugit suliaq suliarineqartariaqarpoq. Unnerluussissut ”mandatsvig” taakkartorneqartoq ullaaq saqqummiinermi eqqaaneqanngilarluunniit taamaattumik peqqutissaqarluarsorivugut illersuisoralugu suliap ingerlateqqittariaqarneranut, Jens Napãtôk’ oqarpoq.
Suliap ingerlanerani nutserisoqarniarnikkut ajornartorsiortoqarsimavoq, soorlu politiit apersuinerminni kalaallisut oqaasillit qallunaatut apersortarsimallugit.
Suliaq ukiuni arlalinni ingerlareersoq Østre Landsretimut ingerlatitseqqinnermi asuli sivitsorsaannarneqassanngila?
- Soorunami inuttut uannut oqimaassimaqaaq ukiut sisamanngortut – ukiut tallimat tungaanut bilagit pisoqaassuseqartut suliareqqitassanngortissallugit.
- Soorunami eqqarsarnartoqaraluartoq sivisugaluartorlu, isumaqarpunga maannakkut atima salinneqarsinnaanissaa siunissamullu ingerlaqqinnissaq eqqortoq pisariaqartoq. Piviusoq qulakkiivillugu aaqqinneqarnissaa siunertaralugu suliaq naammasserusuppara.
