Eqqakkat tamanit ippigineqarput
Eqqagassat sumi tamaani illoqarfinni pinngortitamilu takussaapput, takornarialli kisimik ippigusuutiginngilaat.
Innuttaasut aamma qisuariartalersimapput, nalunaannartarporli sumut naammagittaalliussanerluni.
Ilulissani pinngortitamut siunnersortimut Naja Habermann-imut, saaffiginnittoqartarsinnaavoq, taassumalu isumagisarpaa innuttaasut saaffiginnissutaat pimoorunneqarnissat isumagineqarnissaallu:
Ukioq manna suliarisimasatta ilagaat Illerngit eqquluitsuutitsiniarluni suliniarneq, apriilimi ingerlanneqartoq, innuttaasut saaffiginninnerisa kingorna aallartittoq. Illinerni eqqagassat annertusigaluttuinnarmata iliuuseqarfigineqaqqullugu saaffiginnittoqarpoq, eqqagassat sumi tamaaniitut naminneq iluarinngilaat kisiannili aamma annilaangatigaat takornarissanut qanoq sunniuteqarsinnaanera. Taava eqqarsaatersuutigaarput qanoq iliorsinnaanerluta, nipitittakkanik qimussiminnut snescoteriminnullu nipitissinnaasaannik sanavugut illerngit eqqiluitsuutinnissaannut oqariartuutilimmik. Nipitittakkamik taassuminnga nipititsigaanni qanoq isumaqarnerlutik takutittarpaat. Oqaluuserinissaalu immaqa ajornannginnerulerluni. Naja Habermann oqaluttuarpoq.
Allanik assigiinngitsut aamma saaffiginnittoqartarsimavoq, ilaatigut talittarfik pillugu. Salinneqarnissaa pisariaqartorujussuuvoq. Ajornartorsiulli taanna uanga imaaliallaannaq suliarisinnaanngilara, kisianni suliniut ingerlavoq. Kommunemi politikerit piumasarivaat illoqarfik tamakkerlugu eqqagassanik ajornartorsiuteqarneq pillugu suliniartoqassasoq.
Inuit eqqarsaatigisarsimanngikkunikku, oqarfigineqartarsimanngikkunillu tamaanngaannaq eqqaaneq ajortuusoq, naliginnaasutut isigissavaat. Apeqqutaavortaaq qangaanerusoq ileqquusimasut. Suna tamaat pinngortitameersuummat atoriikkat tamaanngaannaq igikkaluaraanni ajoqutaaneq ajormat, massakkulli eqqagassagut allanngornikuupput, plastikkit, savimerngit igalaaminillu tamaanngaannaq eqqaraanni pinngortitamut ajoqutaassapput.
Ilulissani pinngortitamut siunnersorti Naja Habermann, Pia Christensen-imit apersorneqarluni taama oqarpoq.
Naja Habermann-ip akissarsiaasa amerlanerpaartaat Avatangiisinut aqutsisoqarfiup akilertarpaa. Aaqqissuussineq taanna Kalaallit nunaanni kommuninut arlalinnut neqeroorutigineqarnikuugaluarpoq, marluinnaalli atorpaat.
