Eqqakkanut tunngasut iliuuseqarfiginiarpaat
Nutarterpoq 13.10. kl. 9.29
Eqqakkat pillugit akisussaassuseqarneq sianiginninnerlu annertusarniarlugit tv-kkut paasisitsiniaasoqassaaq.
Puiaasat utertinneqartartut pillugit nunarput tamakkerlugu aaqqissuussisoqassava? Puiaasat atorneqartartut amerlanerit utertitsisarnermik aaqqiissuussinernut ilannguneqassappat?
Eqqakkat assigiit suussuseqatigiikkuutaarlugit iginneqartalissapput, ilaatigut tamakkuupput naalakkersuisut eqqakkanut suliniutaannut ilaasut.
Inuit eqqaasarnerannut eqqarsalersitsisumik sisamanngorpamiit novembarip naanissaata tungaanut takutitassiamik tv-kkut aallakaatitsisoqartalissaaq.
Puiaasanik utertitsisarneq Nunatta kitaani kujataanilu atorneqartoq malillugu Avannaani Tunumilu qanoq assingusumik iliortoqarsinnaanersoq misissorneqalerpoq.
Namminersorlutik Oqartussat ataanni suleqatigiissitaliamik pilersitsisoqassaaq, puiaasanik utertitsisarneq qanoq aaqqiiffigineqarsinnaanersoq misissorneqassalluni, Avatangiisinut qullersaqarfimmit nalunaarutigineqarpoq.
Aamma puiaasat utertinneqartartut plastikkiusut mingutsitsinnginnerusunik qanoq taarserneqarsinnaanersut misissorneqassaaq, aamma sodavandit qillertuusanik puullit utertinneqarsinnaanerat misissorneqassalluni.
Eqqagassat iginneqannginnerini eqqagassat ulorianartut uloriananngitsullu immikkoortiteqqaarlugit igitsisarneq maannakkut Uummannami misileraaffigineqarpoq.
Misileraaneq iluatsissappat, Nunatta sinnerani atuutsinneqalersinnaavoq.
Eqqakkanik isumaginninnissamut pilersaarummi Naalakkersuisut illoqarfinnit ikuallaaveqanngitsunit illoqarfinnut ikuallaaveqareersunut assartuisinnaanissamut periarfissanik annerulersitsiniarput. Tamanna imminut akilersinnaalluartoq, Naalakkersuisut iliuusissatut pilersaarusiaminni allapput.
