Eqqakkanik isumaginninnerup pitsaanerulernissaa ujartorpaat

- Eqqagassanik ikuallaasarnerit qiviassagutsigit immitsinnut aperisariaqarpugut: Tamanna naammappa? Uanga isumaqarpunga naamik, Marie Fleischer oqarpoq, nangipporlu:

- Mingutsitsivallaannginnissaq pillugu Naalagaaffiit Peqatigiit aalajangersagaata, Stockholm Konventionip, Kalaallit Nunaata atuutsilersissimanngikkaa tusarakku tupaallaqaanga. Taamaammat atuutilersinneqarsinnanissaa pillugu misissuileruttorpunga, inatsisartunut ilaasortaq oqarpoq, silallu pissusaata allanngoriartornerata Kalaallit Nunaannut kingunerisai, nunanut allanut naalakkersuisup, Aleqa Hammondip, nunanut allanut angalalluni oqaluttuareqattaarmagit apeqquserlugit:

- Ilumoorsinnaanngilaq nunanut allanut naalakkersuisoq Kalaallit Nunaanni pissutsit aaqqiivigeqqaarnagit nunat allat tikillugit oqaluttuaqattaassaguni, Marie Fleischer oqarpoq.

Ikuallaaviit pillugit aaqqiisoqarnissaa pillugu Inatsisartut avatangiisinut ataatsimiititaliaanni oqallisineqartariaqartoq, ataatsimiititaliap siulittaasua Emilie Olsen, Atassummeersoq oqarpoq:

- Nunaqarfinni ikuallaavit pillugit ataatsimiititaliami eqqartueqattaarpugut, naalakkersuisumillu Kim Kielsenimik upernaaq ataatsimeeqateqarnikuulluta, annerusumilli kinguneqanngitsumik. Taamaammattumik ataatsimiititaliap ajornartorsiummik aaqqiiniarnissaa pingaaruteqarpoq, Inatsisartut avatangiisinut ataatsimiititaliaanni siulittaasoq Emilie Olsen, Atassut, oqarpoq.