Eqqakkanik isumaginninneq pitsanngorsarnianngilaat
Tamanna avatangiisinut naalakkersuisup, Kim Kielsenip, Inatsisartunut ilaasortamut Marie Fleischerimut akissutaani ersersinneqarpoq.
Tamatumunnga tunngaviuvoq nunaqarfinni ikuallaavippassuit ajoquteqarneri pissutigalugit maaniinnaq eqqakkanik ikuallaasoqartarnera.
Marie Fleischerip apeqquteqaatigaa, kommunit eqqagassanik isumaginninnissamut piumasaqaatinik malinninngippata, tamanna kommuninut kinguneqartinneqassanersoq, taamali pisoqarnissaa ilimananngilaq. Tassami Kim Kielsen akissummini allappoq, kommunit ullumikkut aningaasaqarnertik atugassarititaasullu tunngavigalugit eqqagassalerinermi pisussaaffimminnik isumaginnittartut.
Akissuteqaammi aamma oqaatigineqarpoq Kalaallit Nunaanni ammaannartumik eqqakkanik ikuallaasarnermi mingutsitsineq pillugu uuttortaasoqarsimanngitsoq.
Eqqakkanik isumaginninnerup pitsanngorsarnissaanut 2009-mi aningaasanut inatsimmi aningaasaliisoqanngilaq. Naalakkersuisut eqqagassalerinermut pilersaarut kingusinnerusukkut saqqummiuppassuk aningaasalersuinissamut siunnersuutit ilanngunneqartussaasut, naalakkersuisunut ilaasortaq, Kim Kielsen akissuteqaammini allappoq.