Eqqagassat ulorianartut

Nunatsinni eqqagassat sumi tamaaniittut oqaluusereqattaaqqammerpagut. Sumi tamaani pappilissat, puiaasat seqummakut allallu puukut igiinnarneqartarsimapput.

Kusanaakkaluartoq, takornarissanillu qimaasitsisinnaagaluartut, ulorianavinngillat.

Allalli ulorianarnerupput.

Batteriit atornikut, uuliakut, qarasaasiakut, oqarasuaatit angallattakkat seqummakut, akoorutissat ilaalu ilanngullugit – tamarmik toqunartortallit.

Nuummi tamakku massakkumut eqqaavissuarmut pisarput. Kommuneli septembarimiit tigooraavimmik nutaamik ammaaniarpoq, miljøingeniøri Kenneth Egeskov Pedersen oqarpoq.

Tigooraavimmi eqqagassat iluamik immikkoortiterneqarsinnaapput tamannalu iluaqutaassaaq. Ulorianartortaat immikkoorteriarlugit Danmarkimut nassiunneqarsinnaassapput, uloriananngitsullu ikuallanneqarlutik.

- Avatangiisit eqqasaatigalugit aammali aningaasaqarneq eqqarsaatigalugu akilersinaavoq, miljøingeniøri oqarpoq.

Tigooraaviup ilimagaa ukiut tamaasa eqqagassat 190 tonsit tigusinnaasassallugit, annerpaartaa uliakuusassooq.