Eqqagassanik immikkoortiterineq iluatsitsiffiulluartoq
Igalaamerngit qillertuusallu containerimut taakkununngarpiaq eqqaaviusumut iginneqartarput, eqqagassallu allat containerimut allamut iginneqartarlutik. Sisimiuni pisariunngitsumik eqqagassanik immikkoortiterisarneq iluatsitsiffiulluartutut oqaatigisariaqartoq, Qeqqata Kommuniata nittartagaani atuarneqarsinnaavoq.
Eqqagassanik immikkoortiterisalernikkut eqqakkat ikuallassinnaasut kisiisa eqqakkanik ikuallaavimmukaanneqartalerput eqqakkallu allat allatut isumagineqartalerlutik.
- Eqqagassat taamatut immikkoortitertarneri ajornakusoornerulaaraluarpoq, innuttaasut taama amerlatigut taamatut iliuuseqarnerat assut nuannaarutissaavoq. Aamma tamattaallu avatangiisinut akisussaaffiup ilamininnguanik tigusinitsigut qanoq allannguisinnaatiginitsinnik takutitsivoq, teknikkimut avatangiisinullu ataatsimiititaliami siulittaasoq Hans Frederik Olsen oqarpoq.
Eqqagassanik immikkoortiterilernerup kingunerisaanik eqqakkanik ikuallaavik 2007-imiilli aatsaat taama kissamik annertutigisumik pilersitsiviuvoq.