Eqqaassutissiarsuaq tillinneqartoq

Københavnimi oqaluffik Vor Frue Kirke nalinginnaanngilluinnartumik tilliffigineqarsimavoq, tassami Daavimik eqqaassutissiaq 3,2 meterisut portutigisoq 2,5 tonsimillu oqimaassusilik tillinneqarsimammat.
Allattoq Louise M. Kleemann
oktobarip 17-at 2008 12:31

Daavimik eqqaassutissiaq Sydhavnimi Flemming Brian Nielsenip ujaqqanik ilusilersuiffiutaani iluarsaanneqartilluni tillinneqarpoq.

-Ippassaq ullaakkut nalunaaqutaq arfineq-marlup missaani biilertumma kalerrippaanga tammarsimanerarlugu. Tamanna ilimaginngilluinnarsimagaluarpara, tillinneqarsinnaanngikkaluarpormi, Ujaqqanik ilusilersuiffiutilik Flemming Brian Nielsen aviisimut Politikken-imut taama oqaluttuarpoq.

Tillinniat lastbiileqarsimapput, imminnullu kiveriarlutik Daavimik eqqaassutissiaq tigusimallugu. Tillinniarneq taamaattoq minnerpaamik akunnermik ataatsimik sivisussuseqarsimanissaa Flemming Brian Nielsenip ilimagaa.

Taassuma aamma ernumassutigaa eqqaassutissiaq bronzemik sanaajusoq aseroriarlugu tuniniarneqaratarsinnaanera, taamaattumimmi ilusilimmik allamik nassaassaqanngilaq, assilillugulu sananiaraanni suliarinera sivisussaqaaq. Daavimik eqqaassutissiaq sanaqqinneqassappat 2,5 mio. koruuninik akeqarnissaa ujaqqanik ilusilersuiffiutillip Flemming Brian Nielsenip eqqoriarpaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq