Eqqaasarnermi pissusipalaat allanngortariaqarput

Sikut puukui, puujaasat seqqummakut, illoqarfinni eqqaaviit ulikkaaqqasut, grilleriffissat ataasiartakkat tamaanngaannaq qimatat qaqqanilu puussiat igitat.

Takornarissat Kalaallit nunaannut pinngortitaq mingutsinneqanngitsoq takornariaraangamikku, eqqagassat sumi tamaaniittut naammattoortarpaat. Taamaattoqartuaannarsinnaanngilaq, Nunatsinni Takornariaqarnermi Inuussutissarsiornermilu Siunnersuisoqatigiit pisortaat Stig Rømer Winther oqarpoq. Nunatsinni eqqagassalerineq takornariaqarnermut ajoqutaalersinnaavoq.

Takornariaqartitsisarusukkutta nerisassaatigullu, raajat, qalerallit, umimmaat savaaqqat ilaalu ilanngullugit, avammut niuerutigisarniarutsigit, oqarluta nunamit saligaatsumeersuusut, taava iluaqutaanngilaq tikeraat takornarissallu tikikkaangamik siullertut takusassappassuk nuna eqqagassanik ulikkaartoq.

Meeqqat mamakujuttut puukuinik tamaanngaanaq eqqaanerat, inuillu eqqagassanik soqutigisaqanngivillutik pinngortitamut eqqaanerat, takornariaqarnermut avammullu niuernermut akornutaasinnaapput.

Ajornartorsiut tamanna politikerit iliuuseqarfigisariaqanngilaat, inuinuna tamatta maani najugaqartugut nunarput saligaatsuunissaa isumagisariaqaripput. Inuillu taamaaliorsinnaanngippata eqqaasut akiliisillugit pillarneqartalernissaannik politikerit aaliangiisariaqarput, soorlu nunani allarpassuarni taama inatsiseqartoq. Nunarput saligaatsutut tusaamasaatikkusukkutsigu, nammineq akisussaaffigisariaqarparput saligaatsuutinnissaa. Stig Rømer Winther oqarpoq.