Eqalussuaq misiligummik aalisarneqalissaaq
Tasiilami aalisartut ullorsiumminni eqqaamassutissaminnik juunip 24-anniit 29-ata tungaanut krydsiliisariaqassapput. Tassami eqalussuit qanoq suliarineqarnissaat atorluarneqarnissaallu siunertaralugu Kalaallit Nunaanni Aalisartut Piniartullu Kattuffiat aamma Kommuneqarfik Sermersooq ulluni taakkunani pikkorissartitsiniarput.
Aalisagarujussuaq taanna 1930-kkunnili tunineqarsinnaajunnaarpoq, taamaammat saniatigut pisarineqaraangami iluarineqarpallaarneq ajorluni. Eqalussuulli Tunumi tunisassiarineqartalernissaa Greenland Companyp maanna pilersaarutigaa.
Aallaqqaammut misiliilluni aalisartoqassaaq, eqalussuup amia suliarisassanngorlugu Islandimut nassiunneqartassaaq, avalerai nataqquilu nerisassiornermut nakorsaasiornermullu atugassanngorlugit Kinamut nassiunneqartassallutik.
Greenland Companymiit aallartitat marluk uuma qaammatip ingerlanerani Kinaliassapput, eqalussuup ilaanik tamaani pisarnissaq naggataarutaasumik atsioriartorlugu. Japanimissaaq Koreamilu soqutiginnittoqarpoq.
