Eqalussuaq arriitsuararsuarmik ingerlaartarpoq
Siornatigut misissuinerit paasinarsisippaat, Nunatta eqalussuaa puisitortarsimasoq, maannalu ilisimatuut ilimagilerpaat, eqalussuup puisit sinitsillugit terlinganeerlugit pisarisarsimassagai.
Norgemi ilisimatuut isumaqaqqaarsimagaluarput, Nunatta eqalussuaata puisit toqungasut immap naqqanut kivisimasut nerisarai.
Puiserpassuilli toqungasut Svalbardip sineriaaniittut misissoramikkik isumaqarsimagaluarput Nunatta eqalussuai naammatsivillutik puisituussimassasut, taamaattoqanngitsorli paasivaat.
Tamatumunnga taarsiullugu paasivaat, eqalussuit puisit taamaallaat nutaatillugit nerisaraat.
Ilisimatuut Nunatta eqalussuinik nalunaaqutsersuigamik, eqalussuup paperuni qanoq sukkatigisumik aalatittarneraa paasisaasa ilagaat.
Paasissutissat paasinarsisippaat, eqalussuup ingerlaartilluni papeqquni illuaniit illuanut uterlugulu sekuntini arfineq-marlunni aalatittaraa.
Taamaalineranilu imaq 2 gradiinnarnik kissassuseqarmat, tamanna taama arriitsigisumik aalasarneranut attuumassuteqassasoq ilisimatuut ilimagilerpaat. Tassami nukimmik sipaarniarlutik taama arriitsigisarnissaat ilimagileramikku.
Ilisimatuut ilaatigut allapput, puisit issittumiittut nannunut illersorniarlutik imaani sinittartut, taamalu uumasunut kiisortunut paasiuminaatsunut taakkununnga pisariuminartuullutik.