Paasisat nutaat Eqalussuaq 512-inik ukioqalersinnaasorineqartoq
Eqalussuit utoqqarsuanngorsinnaapput.
Ilisimatuussutsikkut misissuinermi nutaami ilisimatuut danskit uumasuni qimerlulinni eqalussuaq ukioqqortunerpaanngorsinnaasoq paasisimavaat.
Eqalussuarni ilisimatuunit misissuiffigineqartuni ukioqqortunersaasoq ukiunik 272-it 512-illu akornanni utoqqaassuseqassangatinneqarpoq.
Nittartagaq Videnskab.dk taama allaaserisaqarpoq.
Tassa imaappoq, Frankrigimi 1789-imi mumisitsineq sioqqullugu aammalu Columbusip Amerikamik 1492-imi nassaarnerata nalaani uumasimavoq.
- Suut nalaanni uumasinerani eqqarsaatigivallaanngilara, Tordenskjoldilli nalaani uumasimassaaq, imaani uumassusilinnik ilisimatooq Københavnillu Universitetiani ph.d.-nngorniartoq Julius Nielsen misissuinermik ingerlatsisuusoq Videnskab.dk-mut taama oqarpoq.
Misissuineq ilisimatuussutsikkut atuagassiap Sciencep saqqaani saqqummmiunneqaqqammerpoq.
Aamma atuaruk Eqalussuit toqunartortallit
Tobias Wangip Aarhusip Universitetiani uumassusilinnik ilisimatuutut professoriusup paasisat nutaat aamma nuannaarutigai.
- Misissuineq pitsaalluinnartuuvoq alutornartuullunilu, uumasummi pillugit ilisimasanik nutaanik takutitsivoq, taamaammat paasisassanik pissanganartunik allanik suli peqassaaq, Videnskab.dk-mut taama oqarpoq.
Eqalussuit ukioqqortuupilussuanngorsinnaaneri uumassusilinnik ilisimatuut qangali ilisimareerpaat, ukioqqortussusaasali aalajangersarnissaannut maannamut periaasissaqarsimanatik.
Julius Nielsenip uumassusilinnik ilisimatuunngorniarnermini oqalugiartoqarnerani eqalussuup ukioqqortuupilussuanngorsinnaanera siullermik tusarsimavaa.
Pinngortitaleriffimmilu sulinermini eqalussuarnit misissugassatut tigusat misissuiffigisinnaasimavai kulstof-14-ilu atorlugu qanoq ukioqqortutiginersut aalajangersarsinnaasimallugu.
/Ritzau
