Eqalussuit toqunartortallit
Ilisimatuut Norsk Polarinstituttimeersut aamma Canadami Windsor Universitymeersut misissuisuupput. Eqalussuit katillugit 43-t nalunaaqutserneqarput tinguinilu misissugassamik peersiffigineqarlutik.
- Tamanna nerisaannik patsiseqarsoraarput. Eqalussuit Svalbardip eqqaaniittut puisitortorujussuupput, puisillu nerisareqatigiiaarnermi qaffasissumik inissisimapput. Tamatuma kinguneranik toqunartunik avatangiisiminneersunik timiminni katersuutsinerulersarput, issittumi uumassusilerisoq Bjørn Munro Jenssen nittartakkamut forskning.no-mut oqarpoq.
Eqalussuit ilisimatusarfigineqarpallaanngillat, siusinnerusukkullu silutuumasuusutut isumaqarfigineqartarlutik. Kingusinnerusukkulli paasineqarluni arriitsuararsuarmik ingerlanermikkut puisinik sinittunik malunnaarsaarlutik saassussisartut.
Eqalussuaq 100-nik ukioqalersinnaasarami, toqunartunik avatangiisimineersunik, soorlu PCB-mik annertuumik timimini katersuutsitsisinnaasarpoq.
Siusinnerusukkut misissuinertigut paasineqarpoq, eqalussuit Nunatta eqqaaniittut, Svalbardip eqqaaniittunit toqunartunik katersuutsitsisarnerat minnerusoq. Tamatumunnga patsisaasinnaasutut oqaatigineqarpoq, eqalussuit Nunatta eqqaaniittut Svalbardip eqqaaniittutut puisitortiginatik aalisagartornerunerat.
Eqalussuit taama annertutigisunik toqunartunik katersuutsitsisarnerat qanoq kinguneqartarnersoq ilisimatuut suli annerusumik paasisaqarfiginngilaat.