Eqalunni napparsimavik atoqqaartinneqarpoq
Nunavumi peqqinnissamut naalakkersuisoq Leona Aglukkaq, atoqqaarfissiortitsinermut atatillugu, napparsimavittaami sulisussat amigaatigineqalersussaanerat eqqaasitsissutigaa. Nunarsuaq tamakkerlugu niviarsiat 100.000-it ukiut sisamat qaangiuppata amigaatigineqalersussaapput, taamaattumillu niviarsiat Eqaluit napparsimattaavaanni sulilerusulernissaannut Nunavumi naalakkersuisut pilersaarutigaat. Pilersaarut qanoq ittuunersoq Peqqinissamut naalakkersuisup oqaluttuarisimanngilaa.
Eqalunni napparsimavittaaq 35-init uninngaffigineqarsinnaavoq, nutaanillu ilaartorneqarpoq, tassa aaviisarfimmik, misissuisarfimmik laboratoriamik, ernisarfimmillu sanasoqarsimammat.
Ukiut aqqaneq marluk matuma siornatigullu napparsimaviliortoqarnissaa pilersaarutigineqarpoq. Nunavut 1999-imi namminersornerulermat, Canadami naalakkersuisut napparsimaviliornissamut pilersaarutaat, Nunavumi naalakkersuisunngortut nangippaat, sananeqarnerata naammassineqarnissaa akilerneqarnissaalu. Napparsimavik 320 millioner koruuninik akeqarpoq, nammassineqarnissaalu Nunavumi naalakkersuisut siulitaasuata Paul Okaliup qineqqusaarnermini neriorsuutaasa ilagaat. Nunavumi naalakkersuisut siulitaasuata peqqinissamullu naalakkersuisuat peqatigalugu napparsimavittaaq ippassaq ammarnersiorpaat, nutaarsiassaqaritisivik CBC tusagassiivoq.
