Eqaluit pinngortitamut qimaannakkat takussaalersimapput
Aavarfiup naalaani tuttut toquinnarlugit ilanngalaaginnakkat naammattoorneqartartut tusartarpagut, eqalunniarnerullu nalaani aamma eqaluit pisareriarlugit qimaannakkat naammattoorneqartalersimapput.
Alluitsup- Paani najugalik, Konrad Ananiassen, ukiorpanngulersuni eqalunniarfiup nalaani ornigannaaminut angalaartilluni ajuallaatigeqisaminik naammattuuisimavoq:
assa ippassaq aliannaarsaariarluta kammalaatigalu kangerlummut pulavugut. Tupinnartumik naammattoorsivugut, tassa kuup sinaani sioqqani, eqaluit minnerpaamik qulit 15-it missaanniittut kusanartorujussuit 1 kiluungajaat missaanni immaqa annerulaartulluunniit, eqallit kusatseruttornikut, tamani tamaani ikeqanngitsut tamaaniipput.
Taamaattunik takunngisaannaratta uagut tassa, piniarneq aamma illersortutoqaagatsigu, suna sakkoq atorlugu taama toqoraapallitsigisoqarsinnaanera paaserusunnassagaluarpoq.
Qanoq ilillugu takusinnaavisiuk inuit piliarigaat?
Tassa aalisagaq namminiiginnarluni nunap qaavanut qaqinavianngilaq, aamma naajat qalluinavianngillat. Inuinuku peqqissaanngitsorujorujussuit soqutigisaqarluaqqissaanngitsut kultureqanngitsut kisimik taamaaliorsinnaasut.
Konrad Ananiassen taama oqarpoq.
Piniarnermut nakkutilliisoq, Per Nukaaraq Hansen, ataatsimik ikiorteqarluni, Ivittunit aallaveqarluni Paamiut Kommunianiit kujataani Nanortallip Kommunia tikillugu nakkutilliisussaatitaavoq. Taama isorartutigisumi nakkutilliisussaatitaanertik sapinngisartik tamaat angalaffiginiartarlugu oqaatigaa, inuillu unioqqutitsisoqarneranik takunnittut pasitsaassisulluunniit qanoq iliorsinnaanerannik aamma siunnersuuteqarluni:
- Tassa siullerpaamik aamma taamatut pisoqartillugu aamma saaffiginnissinnaapput Piniarnermut pisortaqarfimmut, taavalu nakkutilliisoqarfimmut, taakkua aamma ilaatigut isummersinnaapput aamma uagutsunnut anngussinnaavaat anngunneqarsimanngippata. Taanna siullertut periarfissarivaat inuinnaat kikkulluunniit saaffiginnissinnaapput, kisianni tassa ajuissumik pisoqartillugu soorlu immaqa unioqqutitsinertut annertuumik isigineqarsinnaasumik taava politiit piffinni imaluunniit nunaqarfinni kommunefogedit assigisaalluunniit, taakkua tassa pisussaapput aamma pinngitsooratik saaffigineqarnissaannut.
Per Nukaaraq Hansenip assersuutigaa, Qaqortup kommuniinnaani eqaloqarfiit 40-t missaanniittut nakkutigisassaralugit, tamaasalu tikinnissaat ajornakusoorsinnaasarnerarlugu.
