Enoksen WWF-mit isornartorsiorneqartoq

Pinngortitaq pillugu nunarsuaq tamakkerlugu suliniaqatigiiffiup taama aalajangiineq paasiuminaatsippaa.

- Appat nungoratarsinnaanerat pillugu appanniarnerup januaarip aallaqqaataanit unitsinneqarnera appat pillugit aqutsinermut pitsaanerusumut immaqalu aamma eqqissisimatitsilernissamut aallartilluarneruvoq.

Pinngortitaq pillugu nunarsuaq tamakkerlugu suliniaqatigiiffimmiit Kaare Winther Hansen oqarpoq.

AAMMA ATUARUK Appanniarneq januarip aallaqqaataani unissaaq

Nunaarut nutaaq januaarip aallaqqaataaniit atulerpoq, appanniarnerlu ingerlaannaq unitsinneqarluni.

Taamaammat appanniarnerup februaarip naaneranut atuuttussap qaangiutsinnagu timmissat pillugit nalunaarusiap nutaap atulersinneqarnera ingerlatsinermi kukkunerusoq aalisartut piniartullu kattuffiata KNAPK-p Hans Enoksen erseqqissaaffigaa.

Suliamili kukkusoqarsimaneraanermut pinngortitaq pillugu nunarsuaq tamakkerlugu suliniaqatigiiffik isumaqataaqqajanngilaq.

- Kukkusoqanngilaq. Nalunaarut appanniarnerup aallartinnginneraniilli  atuutilersimasariaqaraluarpoq. Piniakkallu aalajangersimaasut piniagaaffianni taakkuninnga piniqqusiunnaartarneq ummikkut ittuunngilaq. Assigiinnarpaa ikummatissanut akit ullormiit ullormut qaffanneqaraangata, Kaare Winther Hansen oqarpoq.

AAMMA ATUARUK Naalakkersuisoq: Appat eqqissisimativinneqassanngillat

Hans Enoksen KNR-imut oqarpoq, timmissat pillugit nalunaarutip nutaap suli appanniarfiugallarnerani atuutilernera kukkunerusoq.

- Oqaatigereerpara, kukkuneq uanga akisussaaffigaara. Qujanartumik aaqqinneqarpoq, tassalu appanniarneq aqagu januaarip arfernaniit februaarip 28-ata tungaanut ingerlagallassaaq.

Hans Enoksen Inuiaat tillernerannut sisamanngornermi taama oqarpoq.

- Naalakkersuisoq Soqutisaqaqatigiinnit tatisimaneqartoq takusinnaavara, Kaare Winther Hansen oqarpoq.

Timmissat pillugit nalunaarut nutaaq piffisamik appanniarfiusumik sivikilliliiffiummat, WWF-ip ilorraap tungaanut aallarnertut taavaa.