Enoksen iluarisimaarinnippoq
Arfanniarneq pillugu ataatsimiititaliarsuarmi Danmarkip naalagaaffeqatigiinnermi sinnersaanera Kalaallit Nunatsinnit iluarisimaarneqarpoq.
Kalaallit Nunaat nammineq siulittaasoorusukkaluarpoq, tamannali allaffissornikut akisuvallaassasoq, Naalakkersuisut siulittaasuat Hans Enoksen oqarpoq. Arfanniarneq pillugu ataatsimiititaliarsuarmi Danmark ataqqineqartoq naalakkersuisut siulittaasuata aamma tikkuarpaa.
Arfattassat 2002-mi kingullermik isumaqatigiinniassutigineqarmata Kalaallit Nunaata ataqqineqarnera malunnarsimasoq Hans Enoksen oqarpoq, neriuutiginerarpaalu siunissami aamma taamaattoqassasoq.
Arfanniarnermik inuussutissarsiuteqartutut neqit atorfissaqartinneqartut pissarsiarinissaat Kalaallit Nunaata soqutigigaa, Naalakkersuisut siulittaasuata, Hans Enoksenip, ilanngullugu eqqaavaa. Kalaallit Nunaata ukiuni tuusintilikkuutaani arfanniartarsimanera, taamaalillutillu inuiaqatigiinnut kalaallinut qanoq pisariaqartiginersoq naalagaaffiit allat paasissagaat naalakkersuisut siulittaasuata neriuutigaa. Arfattassat aappaagu isumaqatiginninniutigineqassapput.
