Enoksen: Aaqqissuusseqqinnermi tamatta pilliuteqassaagut
Akileraartarnermut Atugarissaarnermullu Aaqqissuusseqqinnissaq 2011-mi saqqummiunneqarluni inassutigineqarmat, taamani naalakkersuisuutitaqartartut, tassa Inuit Ataqatigiit aamma Siumut, inuiaqatigiinnut iluaqutaasussamik takussaasunillu allannguilluilluinnartumik aaqqissuuussisimanngillat.
Aaqqissuusseqqinneq piviusunngortinneqassappat, inuiaqatigiit tamattaalluta pilliuteqartariaqartariaqarpugut, taama oqarpoq Parti Naleqqap siulittaasua, Hans Enoksen, qinersinissaq sioqqullugu KNR-ikkut ippassaq oqallittoqarnerani.
Innuttaasut tamarmik pilliuteqartariaqartariaqarput
- Aaqqissuusseqqinissaq iluatsissappat Nunatsinni innuttaasut tamarmik pilliuteqartariaqassapput. Nunarput aningaasatigut pitsaasumik ingerlanneqassappat, innuttaaasut ilaannaat pilliuteqarsinnaanngillat tamatta pinngitsoqarata pilliuteqartariaqarpugut sapinngisamik pitsaanerpaamillu atugassaqassagutta, tamannalu uanga suleqataaffigissavara.
Hans Enoksenip aamma oqaatigaa, aaqqissuusseqqinnginnermi aningaasat annaaneqartut amerlavallaarujussuartut.
- Aningaasarsiornikkut periarfissat massakkut atunngisagut maanna aallartittariaqarlerpagut. Ippassaq itigartissimasaat aqagu aallartinneqartariaqarput. Assersuutigiinnarlugu avaleraasartoorniarnermi pisassat 22.000 tonsit pisarineqanngillat, taakku 200 million koruuninik naleqarput. Taakkununnga akitsuusiinermi Nunatta karsiata 20 million koruunit annaavai taamatullu sulisut akileraarutaat 50 million koruunit tungaanut amerlassuseqartut annaaneqarlutik, Hans Enoksen oqarpoq.
KNR-imi ippassaq oqallinnermi aallarniivoq, Akileraartarnermut Atugarissaarnermullu Aaqqissuusseqqinnermi siulittaasoq, Torben M. Andersen. Taassuma oqaatigaa, Namminersorlutik Oqartussat kommunillu aningaasaqarneri ilugersunartorsiortut tamannalu ajornerulersussaasoq oqaatigalugu. Tamannalu qaangerneqassappat maanna aaqqissuusseqqittoqartariaqartoq kaammattuutigalugu.
Aaqqissuusseqqinnermi akileraartarneq avaqqunneqarsinnaanngitsoq, Inuit Ataqatigiit oqalliseqataannit, Aqqaluaq B. Egedemit oqaatigineqarpoq.
IA: Tamanut oqinnerpaamik aaqqissuusseqqinnissaq pisariaqarpoq
- Nunatsinni pisuunut annersitsinngikkaluarluni akileraartarnikkut aqqissuusseqqinnikkut periarfissaqarpoq, inuit pissakinnerpaat ajornartorsiornerpaallu ikiorneqarnissaannut. Tamannalu naalakkersuinikkut timitalerneqassaaq, Aqqaluaq B. Egede oqarpoq imalu nangilluni.
- Nunarput aningaasatigut ineriartortissagutsigut aningaasarsiorluarnerpaat pisariaqartippavut. Taamaattumik pisariaqartoq unaavoq: Tamanut oqinnerpaamik aaqqissuusseqqinnissaq, pisuut nunguunnagit annersinngikkaluarlugillu pissakinnerit ikiorneqarnissaat pingaaruteqarpoq, Aaqqissuusseqqinnissaq pillugu KNR-ikkut ippassaq oqallinnermi, Aqqaluaq B. Egede taama oqarpoq.
Qinersinissaq sioqqullugu oqallinnerit nangillugit unnugu oqallisigineqassaaq inunnik isumaginninnermut tunngasut, ilaatigut oqallisigineqassalluni meeqqat sumiginnakkat. Tamanna malinnaaffigineqarsinnaavoq KNR-TV-kkut aamma Radiokkut unnugu nalunaaqutaq arfineq pingasup qeqqaniit.
