Enok Sandgreenip siulittaasuunini sorsuutigaa
Borgmesterit sisamat borgmesteritut suliassatik suliariitigalugit Kanukoka-mi siulittaasutut sulinertik nammassinnaassaanngikkaat, Enok Sandgreen isumaqarpoq.
Kanukoka-p allaffissornikkut politikkikkullu aqqissuussaanerata allanngortinneqarnissaanut suleqatigiissitami Martha Labansen ilaasortaavoq.
Suleqatigiissitaq Kanukoka-p allaffissornikkut aaqqissuussaanerata allannguutissaanik siunnersuuteqartussaavoq aammalu siunissami politikkikkut suleriaatsip allannguutissaanik siunnersuuteqassalluni.
- Kanukoka-p pisortaata Martha Labansenip kommunaldirektørillu anguniakkatik suliarisimavaat, Enok Sandgreen tusagassiuutinut nalunaaruteqarluni allappoq.
- Martha Labansen suleqatigiissitami ilaasortaasoq Kanukoka-mi kisimiilluni allaffissornikkut aqutsiniarnerarlugu, Enok Sandgreen aamma oqarpoq.
Enok Sandgreen direktørerisaminik isornartorsiunermi saniatigut Kanukoka-mi allaffissornikkut politikkikkullu allannguutissat pillugit suleqatigiissitap inuttalersorneqarsimanera isornartorsiorpaa, oqarluni suleqatigiissitami ilaasortat borgmesteritik Kanukoka-mi siulittaasuusarnissaannik siunnersuummut tapersersuinerarlugit.
Kanukoka-mi aallartitat pingasunngorpat oktobarip 28-ani ataatsimiissapput, ataatsimiinnermi aalajangerneqassaaq Kanukoka-p siunissami allaffissornikkut aaqqissuussanerata allannguutissaa aammalu politikkikkut sulinermi allannguutissat.