Enok Sandgreen: Nunarput sumununa ingerlalersoq?
Kommunit kattuffiat borgmesterillu sisamaasut aningaasanut inatsisissatut siunnersuut ataasinngorpat oqaluuserissavaat, taamaattorli KANUKOKA-p siulittaasuata Enok Sandgreenip aningaasanut inatsisissatut siunnersuut arlalitsigut uparuagassaqarfigaa.
Ineriartortitsiniarneq taagorneqartoq "putumiit nul'imut" oqaaseqarfigalugu taanna ima aperaaq: "Nunarput sumununa ingerlalersoq?"
Aningaasanut inatsisissatut siunnersuut kommunit kattussuunnerannut pingaarutilerujussuuvoq. Kommunit allaffissornikkut ingerlatsinerannit 36 millionit koruunit aaniarneqarput, tamannali pissutsinik ilisimasakinnermik pissuteqartoq, Enok Sandgreen oqarpoq.
Naalakkersuisut innuttaasut naligiinnerusumik atugassaqartitaanissaat kissaatigaat, soorlu meeqqerivinnut akiliutit aamma utoqqarnik sullissinerup assigiissarneqarnissaannut atatillugu, kisianni 36 millionit koruuninik sipaarnikkut tamatuma anguniarnissa suli ungaseqaaq. Tamannami sulisunik 75-inik soraarsitsinermik kinguneqassaaq. Tamannalu kattussuunnerup 2013-ip tungaanut ingerlanneqaleruttornerani pissusissamisuunngilaq. Sulisunimmi 75-inik annaasaqassagutta kattussuunnerup suliarinera nukillaarluinnartussaammat.
Enok Sandgreenip aamma aningaasanut inatsisissatut siunnersuummi nunaqarfiit eqqugaanissaat maluginiarpaa, nunaqarfinnimi sanaartugassanut 45 millionit koruunit sipaarniarneqarmata.
Innuttaasut atugaat eqqarsaatigalugit misigissuseqarani Nunarput ingerlanneqarsinnaanngilaq. Nunatsinni partiit annersaat Inuit Ataqatigiit nunaqarfinnut politikeerussimavoq, aningaasanummi siunnersuut assartuinermut angallannermullu eqquisussaq inuuniarnermik ajorseriartitsisussaavoq, KAnukokap siulittaasua Enok Sandgreen taama allappoq.
