Ukaleq Slettemark inuusuttut nunarsuarmi pissartanngorniunneranni angusarissaaqqippoq
Kalaaleq sisoraaserluni ooqattaasartartoq Ukaleq Slettemark, inuusuttut nunarsuarmi pissartanngorniunneranni, Slovakiamit ukioq manna aaqqissuunneqartuni, angusarissaaqqippoq, 7,5 kilometerinik isorartussususilimmi ataasiakkaarlutik aallartarnermi tamatumuuna normu 4-nngorluni.
Allattoq Karsten Sommer
februaarip 03-at 2019 12:43
Nutserisoq Mads Lynge
Peqataasut ullumi 60-iupput, Ukaleq Slettemarkilu ajugaasumit 24 sekundinik kigaannerulaarluni normu 4-tut inissippoq, bronzilu 10 sekundiinnarnik inorlugu.
7,5 kilometerinik ingerlaarnermi 20-riarluni ooqattaasartoqarpoq, Ukaleq Slettemarkilu marloriarluni uniuivoq, siullermik ooqattaasarnermi ataatsimik uniuilluni, pingajussaalu ooqattaasarnermi aamma ataatsimik uniuilluni.
Amy Baserga, Schweizimeersoq, ullumi unamminermi ajugaavoq, Tjekkiamiu sølvinnalluni, Norgmeersorlu bronzinnalluni.
Ukaleq Slettemark, inuusuttut sisoraaserlutik ooqattaasarlutik Slovakiami sapaatip-akunnerata massuma ingerlanerani taamaasilluni ataasiarluni nunarsuarmi pssartanngorpoq, normu 6-itut aamma inissilluni, ullumilu tassa normu 4-nngorluni.
