EnCana Corporation isumalluarpoq

Nunarsuarmi uuliasiutileqatigiiffiit annersaat aqqaneq-marluk ulluni makkunani Ilulissaniipput, aatsitassanut ikummatissanullu naalakkersuisup, Jørgen Wæver Johansenip, uuliasiorsinnaanissamut neqeroorut aallarteqqammermagu.

Canadamiut uuliasiutileqatigiiffiata EnCana Corporation-ip vicepræsidentiata Mark Cooper-ip saqqummiussat isumalluarnartoqartippai:

- Naalakkersuisup ullumikkut saqqummiussai isumalluarnarput, paasisimasaqarnerulerpugut, paasissutissalli ilumut atorsinnaaassanerigut nalugallarparput. Paasissutissarpassuit eqikkariarlugit siulersuisutsinnut saqqummiutissavagut, taamaalioreeruttalu ingerlariaqqinnissarput aalajangiiffigissavarput, Mark Cooper oqarpoq.

Taassuma ilanngullugu oqaatigaa uuliasiornissami taamaattumi iluatsitsisinnaanissaq 10 procentiinnaasoq.

Tassa, quleriarluni misileereernikkut aatsaat iluatsitsisoqartartoq oqaatigalugu.

Ulluni kingullerni Kangiani Qiterlermi pisut eqqaallugit nunami eqqissisimaffiusumi uuliasiornissaq iluaqutissartaqartoq Mark Cooperip oqaatigaa.

Aatsitassanut ikummatissanullu naalakkersuisoq Jørgen Wæver Johansen isumalluarportaaq:

- Isumaqarpunga ingerlalluartoq. Uuliasioqatigiiffiit paasissutissat kingulliit piortorpaat, pissangatigeqaaralu qanoq nalilerumaarneraat. Decembarip 15-iata tungaanut piffissaqarput, piffissarlu taanna nallerpat qinnuteqartoqarsimappat qassit qinnuteqaateqarsimanersut aammalu sumiiffiit sorliit pilerinarnerusutut isigineqarsimanersut, aatsitassanut ikummatissanullu naalakkersuisoq Jørgen Wæver Johansen oqarpoq.