Emilie Madsen toquvoq
Borgmester Asii C. Narupip eqqaaniummini Emilie Madsenip borgmesteritut malunnaatilittut qanilaartutullu sulisimanera oqaluttuaraa.
- Arnaavoq qiimasoq inuuserissorlu, kikkunnik tamanik oqaloqateqarsinnaasoq. Nunamini, nunanilumi allani, ikinnguterpassuaqarpoq oqaatsinillu ilikkajasuuvoq, ilaatigut qallunaatut tuluttullu oqalussinnaalluni, Asii C. Narup kommunip nittartagaani ilaatigut taama allappoq.
Emilie Madsen Illoqqortoormiuni 1989-imiit 1992-imut, aammalumi 1993-imi, borgmesteriuvoq. Niunernikkut ilinniagaqarsimavoq, KGH-mi KNI-milu ukiorpassuarni sulisimalluni.
- Takornariat umiarsuarnik tikillutik Illoqqortoormiunut aqqusaartut takornariartinnerini illoqarfimminik ilisimannilluarnini, ammasuunini inunnillu oqaluussillaqqissuunini aamma atorluarpaa, Asii C. Narup oqarpoq.
Illoqqortoormiuni imigassat sakkortuut 2001-imi tuniniarunnaarallarnerisa nalaanni Illoqqortoormiut Komitianni meeqqanut, inuusuttunut inersimasunullu periuusissanik siunnersuuteqartussani, ilaasortaasimavoq.
Toqukkut qimagunnermigut meeqqani, ernguttani ilaquttaminilu qanigisani qimappai.