Elvis pillugu katersugaasivik Danmarkimi ammarniarpaat
2011-mi poorskimi takornarianut ussassaarut nutaarluinnaq aamma maanngaanneersunut pilerigineqarsinnaasussaq ammarneqassaaq. Suliniuteqartup Henrik Knudsenip katersugaasivik nutaaq immikkut illuinnartoq ima nassuiarpaa:
Aqqusineq massakkut Århusvejimik taaguutilik atuaraanni imaaliallaannaq motorvejiminngaanniit takuneqarsinaanngilaq.
- Jyllandimi Randersip qanittuani nunaannaap aquserngatigut ingerlagaanni katersugaasivik Elvis Presleymut tunngatitaq "Graceland", Elvisip illorsua assilillugu sanaaq, Jyllandip qeqqanut inissinneqarsimasoq tikittariaqarpoq, Henrik Knudsen oqaluttuarpoq.
Illu Amerikami naalagaaffinni kujallerni qangatut sanasaaseq atorlugu sanaaq tupinnaannartunik sukalersugaq siornatungimigut aamma marlunnik løviusartaqarpoq.
Henrik Knudsen Elvisimik ingasavimmik nuannarisaliuvoq. Illorsuarmut, saqqummersitanut, neriniartarfimmut, Amerikamiut nerisassaataannut, ininut nalliuttorsiortarfinnut filmertarfimmullu isumassarsisuuvoq.
- Eqqumiitsulianik saqqummersitsisarumaarpugut, nipilersortitsisarumaarpugut, kulturit suulluunniit Elvisiinnarmut tunngasuunngikkaluit, aammattaarli eqqumiitsuliat suulluunniit taassumalu silarsuarisimasaanut tunngasut saqqummersinnissaat aaqqissuuttassavavut, Knudsen oqarpoq.
Aappaagu poorskimi Elvis pillugu ussassaarut ammarneqassaaq, Knudsenillu Elvis pingaarnersaassasoq qularinngivippaa.
- Elvis maanna soqutiginaateqarpoq, tassami Elvis atuuttuarpoq, Elvisilu immaqa kulturimut nutaamut qularnanngitsumillu atajuartussamut ilisarnaataalluni, Henrik Knudsen naggasiivoq.
